Esta semana o Parlamento de Galicia ten unha segunda oportunidade para aprobar o inicio dos trámites necesarios para implantar o Bacharelato de Artes en Redondela. Malia que na primeira ocasión a proposta non saíu adiante ao votar en contra o PP, dende as ANPAs son optimistas unha vez que os populares de Redondela si se sumaron no pleno ao resto dos grupos e de xeito unánime amosaron a necesidade de que esta modalidade se implante nalgún dos institutos da vila.
A proposta de Bacharelato de Artes para Redondela está baseada na demanda real que existe destes estudos, do sobreesforzo que teñen que realizar a rapazada interesada en cursalo ao ter que desprazarse até Vigo, Pontevedra ou Mos e, tamén, á entidade poboacional de Redondela. De feito, concellos con menor poboación coma Mos ou Ponteareas contan con esta modalidade no bacharelato.
Unha proposta que este mércores o deputado do BNG, Manuel Lourenzo, defenderá por segunda vez na Comisión 4ª de Educación. Na anterior ocasión a proposta non obtivo votos suficientes ao contar co voto en contra do PP.
A situación agora é diferente, unha vez que o pasado mes de xuño, o pleno municipal de Redondela aprobou por unanimidade unha proposta presentada polas ANPAs de Redondela onde se solicitaba o Bacharelato de Artes e se instaba á Xunta de Galicia, competente na materia, a iniciar os trámites para a súa implantación. Neste sentido, explican dende a Anpa do Mediño que agardan que a proposta reciba os votos favorables dos tres grupos do Parlamento, tamén presentes no Pleno municipal.
Insisten que o Bacharelato de Artes para Redondela é unha cuestión de xustiza, sendo Redondela como é un referente en canto a actividades, eventos, agrupacións, profesionais e empresas culturais que merecen unha formación regrada pública, gratuíta e de calidade desde o Bacharelato.
Desde as ANPAs de Redondela agardan que os grupos representados no Parlamento (PP, BNG e PSOE) estean á altura e non marxinen a Redondela.
