A cidadanía de Redondela e de diversos centros de día de Galicia e de toda España está a mobilizarse para apoiar ás vítimas da catástrofe provocada pola DINA en Valencia, que devastou moitas vivendas e deixou a numerosas familias sen fogar. Despois da limpeza das casas, o seguinte paso crucial é eliminar a humidade acumulada para poder pintar e restaurar os espazos afectados.
A directora do Centro de Día de Picaña, en Valencia, unha das zonas máis afectadas pola gota fría que arrasou municipios enteiros en outubro, fixo un chamamento solidario para reverter a dramática situación, xa que as súas instalacións foron completamente destruídas. Pedro López, director do Centro de Día Os Cortizos, explica que decidiron unirse e actuar “para axudar a unha compañeira, pero sobre todo para axudar as persoas afectadas que están a vivir unha situación insostible”.
López denuncia a falta de organización do voluntariado e sinala que, a pesar dos avances, a recuperación da normalidade podería levar até dous anos. Mentres tanto, é fundamental que as persoas vulnerables poidan regresar aos seus fogares, xa que actualmente hai maiores durmindo en tendas de campaña na rúa, facilitadas por militares.
As necesidades máis urxentes son os deshumidificadores domésticos, que permitirán secar as vivendas antes de continuar co proceso de rehabilitación.
Como colaborar?
Existen dúas maneiras de participar nesta campaña solidaria:
- Directamente nos centros: Un peto estará dispoñible nos centros implicados para todas aquelas persoas que desexen realizar a súa colaboración ao asistir aos mesmos.
- A través de Internet: Quen prefira colaborar desde a súa casa pode adquirir un deshumidificador a través dun enlace facilitado en redes sociais. O material deberá ser enviado á seguinte dirección: Gerogarden, Calle Islas Canarias 112, Valencia, 46023. Alí, o persoal técnico encargarase de repartir os deshumidificadores entre as vivendas afectadas. Segundo Pedro López, organizador da campaña en Redondela, “o obxectivo non é axudar ao Centro de Día de Picaña, senón ás familias, e para evitar calquera tipo de estafa ou polémica, os enlaces de compra serán actualizados regularmente, asegurando que os produtos cheguen directamente á localización indicada sen pasar por ningunha entidade intermedia.”
Centros implicados nesta campaña solidaria:
- Centro de Día Chapela
- Centro de Día Os Cortizos (Redondela)
- Centro de Día Cangas
- Centro de Día Parque Castrelos
- Centro de Día Hispanidade
- Centro de Día Verín
- Centro de Día Boas Apertas
Ademais de enviar os deshumidificadores, tamén se encargarán de difundir esta campaña entre as persoas usuarias e as súas familias para que, quen desexe, poida unirse á causa. A súa colaboración será esencial para que as familias afectadas poidan restaurar as súas vivendas e recuperar a normalidade nas súas vidas.
Mención especial fan desde Os Cortizoos á Iniciativa Adopta Un Maior que está colaborando activamente na campaña solidaria, conectando voluntarios con persoas maiores afectadas pola DINA, para axudalas a recuperar a normalidade e asegurarse de que reciban todo o necesario dende o principio ata o final.
