O deporte náutico de moda chega a Cesantes e, para que todos poidan gozalo, Salitre Club Deportivo ofrece un curso de iniciación gratuíto. O próximo domingo 31 de xullo, ás 15:00, os monitores do club redondelán ofrecerán aos asistentes unha toma de contacto con esta vela lixeira.
Clase teórica e práctica para descubrir as sensacións de deslizarse sobre a auga coa tracción que o vento exerce sobre o wing.
Este curso está aberto a todo o mundo e non require de coñecementos previos nin preparación física. O único requisito para acceder ao curso gratuíto de wing é efectuar a reserva na web do club: salitreclubdeportivo.com
Con esta iniciativa, que conta co financiamento do GALP (Grupo de Acción Local do Sector Pesqueiro), Xunta de Galicia e Fondos da Unión Europea, Salitre achega ao público unha nova forma de gozar da Enseada de San Simón, de maneira saudable e respectando a contorna.
