Un total de 42 comercios de Redondela e Chapela participan na fin de semana dos días 24 e 25 de setembro en dúas xornadas de ofertas e descontos, Unha cita que terá o seu centro neurálxico na rúa Ribeira, onde se instalarán diferentes postos de venta, e nos propios establecementos que sacarán a súa mercancía á rúa. Unha iniciativa comercial da Asociación de Empresarios animada dende a Concellería de Cultura cunha programación itinerante enmarcada no Festival de Artistas de Rúa.
O Concello salienta a importancia de recuperar este Festival que, malia as restricións pola Covid, permite contar con espectáculos itinerantes que animarán o centro da vila. Explicaba a alcladesa Digna Rivas na presentación do evento que “unha das primeiras medidas da Concellería de Cultura foi retomar esta cita festiva que chega a súa XXII edición, coordinándonos coa Asociación de empresarios para animar así os Shopping Days”.
Espectáculos itinerantes de compañías galegas e asturianas: Os Velocíclopes, Latexo Percusión, o circo Krasnobarak, Ulterior A Viaxe e Pachamama, son as cinco propostas que se poderán ver en diferentes escenarios nas tardes do venres e sábado da vindeira semana. “Propostas divertidas orientadas a todos os públicos”.
Unha programación que complementa a proposta do comercio local, os Shopping Days: “unha mestura entre a feira de oportunidades e as shopping nights, un evento de dinamización comercial que conxuga unha zona de feira con dez postos que estarán instalados na Rúa Ribeira e a exposición que os propios establecementos sacarán ao exterior”. Produtos “fin de temporada” que o consumidor poderá adquirir a un prezo moi económico. Explicaba Julia Alonso, dende a Asociación de empresarios que “as fortes rebaixas dos produtos outlet combinaranse tamén con descontos en produtos de tempada que acaban de chegar ás tendas”.
Unha iniciativa á que se sumaron un total de 42 comercios de todo o concellos onde atoparemos todo tipo de produtos: moda, agasallos, calzado, xoiería, mobles, alimentación e mesmo vehículos de ocasión.
