O Concello de Redondela ten programadas, para este fin de semana, distintas actividades co da celebración do Ano das Mulleres da Illa. Deste xeito queren poñer en valor “a solidariedade, humanidade e heroísmo das mulleres que foron unha gran axuda para os presos políticos da Illa de San Simón e no barco-prisión Upo Mendi”. O paseo de Cesantes acolleu esta mañá a inauguración da mostra fotográfica “As mulleres da illa de San Simón. A solidariedade é feminina”, que até agora estivo exposta na Alameda Castelao. A alcaldesa , Digna Rivas, acompañada de varios concelleiros, representantes do Obradoiro de Estudos Locais Fernando Monroy, e familiares das “madriñas” da illa participaron no acto. Rivas explicou que, grazas á colaboración do Obradoiro, a mostra ampliouse con 9 fotografías máis doutras tantas mulleres da parroquia que formaron parte desa rede solidaria das Mulleres da Illa.
En representación deste colectivo, Manuel López agradeceu o traballo do Concello por esta “merecida homenaxe” ás mulleres que axudaron aos presos da illa, e tamén salientou a colaboración das familias da parroquia, para poder identificar e recoller a historia destas mulleres. Manolo contou tamén a súa propia experiencia familiar, xa que unha das súa tías avoas foi unha desas “madriñas”.
Doutra banda, mañá sábado 17 de xullo o Concello de Redondela organizará a homenaxe institucional ás mulleres da illa de San Simón. O acto desenvolverase pola tarde na propia illa, que entre os anos 1936 e 1943 foi campo de concentración. No transcurso do mesmo intervirá Cecilia Orge para falar da historia destas mulleres solidarias de San Simón; a presidenta da Deputación, Carmela Silva e a alcaldesa Digna Rivas. Ademais, a música estará a cargo de Antía Muíño. O propósito desta homenaxe é “que non se esqueza esta parte da nosa historia recente e se recoñeza o labor dunhas mulleres que foron verdadeiras heroínas nuns anos de guerra e de posguerra moi difíciles”, sinala Rivas.
As circunstancias da pandemia obrigaron a limitar as 200 persoas o número de participantes. Desta maneira poderán acudir apenas dúas persoas por familia, representantes dos colectivos que colaboraron na homenaxe e representantes de distintas institucións. O Concello de Redondela tamén convidou os alcaldes e alcaldesas dos concellos limítrofes da ría de Vigo, á Deputación de Pontevedra e á Xunta de Galicia.
