Hoxe é Venres 23 de Xullo de 2021

Colectivos veciñais convocan unha concentración informativa sobre os danos de Aucosa

AucosaPantalan

A Plataforma en Defensa da Enseada San Simón, o colectivo de veciños Afectados de Cabanas-Rande e a Asociación de Veciños de Chapela convocan este venres unha concentración informativa na praia de Arealonga. O obxectivo é dar conta á cidadanía dos prexuízos que está a causar a auxiliar conserveira Aucosa. A empresa, que fabrica fariñas e aceite de peixe, está situada no litoral de Cabanas, en Rande. As asociacións explican que tanto os vertidos incontrolados que fai á ría como a emisión de cheiros “nauseabundos” supoñen un grave problema. O prexuízo non é só para os veciños da contorna, que sofren de primeira man estes efectos, senón tamén para a sociedade en xeral e para o ecosistema mariño, xa que as verteduras contaminan a ría. Estiman que os verquidos superan os 15.000 metros cúbicos e os gases de dióxido de carbono os 30 millóns de quilos ao ano. Os convocantes denuncian que a empresa está a utilizar a ría “como un vertedoiro incontrolado”, ao tempo que “atufa” a contorna con cheiros “pestilentes”. Esta situación estase a repetir case a diario nos últimos meses “e a empresa sae impune”, lamentan. Para dar contra desta situación convocan á veciñanza mañá venres, día 9 de xullo, ás 18.30 horas na praia de Arealonga.

Nas últimas semanas téñense producido varias verteduras de grandes dimensións na zona. A análise realizada pola concellería de Medio Ambiente apunta a Aucosa como orixe do verquido. Desde o Concello esixen á Xunta de Galicia, organismo competente nesta materia, que ordene o cese da actividade na auxiliar conserveira polo incumprimento da normativa ambiental.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *