Hoxe é Domingo 13 de Xuño de 2021

Enfrontamento entre Concello e Xunta a conta da reforma da avenida Mendiño

mendiñoradioredondela

O Concello pide á Xunta de Galicia unha rectificación das declaracións nas que culpa ao goberno local de “non interesarse” polo convenio para a reforma da Avenida Mendiño.

O Concello de Redondela pedirá, a través dunha moción presentada polo grupo muncipal socialista, que “a Xunta de Galicia proceda a desmentir as afirmacións escritas nas súas misivas acusando ao goberno local de non interesarse nin realizar os trámites necesarios” para continuar coa sinatura do convenio de reforma da Avenida Mendiño. A rexedora, Digna Rivas, considera “insultante” que a Consellería de Infraestruturas e Mobilidade, respondendo a unha pregunta formulada no Parlamento polo PSdG, afirme que o Concello de Redondela non procedeu a remitir a retención de crédito precisa, “un trámite debidamente realizado, enviado e recibido pola Consellería hai máis de seis meses”, afirma a alcaldesa. Advirte que dende a chegada ao Concello o goberno local interesouse de forma “inmediata” da situación desta obra. Lembra que a reforma da avenida Mendiño “foi presentada en Redondela pola conselleira acompañada do ex-alcalde do PP nas vésperas das eleccións municipais e asegurando que o proxecto xa estaba redactado e as obras sería contratadas ese mesmo verán de 2019”. O interese do novo Goberno de coñecer a situación do procedemento viña dada porque, unha vez no Concello, o executivo entrante “constatou a inexistencia de ningún tipo de documentación sobre dita obra”, aclara Digna Rivas. A partir dese momento, comezan os envíos continuos de oficios dende o Concello á Xunta de Galicia, solicitando información sen que se dera contestación por parte da administración autonómica. No ano 2020 as comunicacións á Consellería por parte do Concello son continuas “interesándose pola situación do convenio que o Concello de Redondela aceptaba todas e cada unha das condicións que a Xunta enviaba, incluída a retención de crédito que tería que achegar o Concello”, apunta a alcaldesa. A contestación da conselleira á pregunta do Grupo Parlamentario Socialista que o Goberno local non emitira a retención de crédito “que eles tiñan no seu poder dende hai mais de seis meses, é un insulto intolerable en calquera circunstancia, pero máis se quen o fai é a administración autonómica”. Para o Goberno redondelán a actitude da Xunta en todo este proceso “está moi ao marxe do que debe ser unha relación administrativamente e que as continuas faltas de respecto ou os continuos desplantes realizados á Alcaldía, non son máis que unha mostra do partidismo dunha Xunta de Galicia que boicotea, sistematicamente, ao Concello de Redondela”. O goberno local chama a atención sobre “o silencio cómplice” do PP de Redondela que “que mira para outro lado”.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *