O grupo As Efémeras participou no acto de homenaxe cun concerto na Alameda Castelao
Ducias de persoas ateigaron onte a Alameda Castelao para participar na homenaxe de Redondela a Xela Arias no Día das Letras Galegas. O acto institucional contou coa participación da alcaldesa, Digna Rivas, e o concelleiro de Cultura, Daniel Boullosa, e pechouse co concerto do grupo local As Efémeras e a interpretación do himno galego a cargo do grupo de gaitas Asubíos de Portocedeira. No seu discurso, Rivas salientou o feito de que sexan tan poucas as mulleres homenaxeadas nas case seis décadas de historia deste recoñecemento. Desde 1963 só cinco mulleres foron homenaxeadas no Día das Letras Galegas: Rosalía de Castro, Francisca Herrera, María Mariño, María Vitoria Moreno e agora Xela Arias. A rexedora puxo tamén en valor que estas mulleres foran quen de abrirse un oco nun mundo que era “terreo case exclusivo de homes”.
Rivas confiou en que a homenaxe deste ano a Xela Arias marque “un cambio de tendencia” como a propia Xela marcou no seu tempo non só como poeta, senón tamén como feminista e activista na defensa do idioma.
O concelleiro de Cultura, Daniel Boullosa, reivindicou tamén o papel das mulleres na cultura e na loita polas liberdades, e pediu á veciñanza “non poder nunca a oportunidade de defender a nosa lingua como parte de nós”.
O grupo As Efémeras ofreceu un concerto no que, como facía Xela Arias, misturaron a música coa poesía e a ecoloxía. O grupo de gaitas Asubíos de Portecedeira pechou o acto interpretando o himno galego.
Homenaxe en Chapela
O acto de homenaxe celebrado onte en Redondela viña precedido do que o domingo acolleu a Alameda Rosalía de Castro de Chapela. Coa participación de Darío Gil, fillo de Xela Arias, o Concello quixo render tributo á figura da poeta e tradutora na parroquia onde foi mestra, e cuxa biblioteca municipal leva o seu nome. O acto contou coa actuación do Coro de Voces Graves de Vigo e a Coral O Piñeiral de Chapela.
