Hoxe é Sábado 31 de Xullo de 2021

A “burla” da peaxe Redondela-Vigo

PEAXE

“Insulto, animalada e tomadura de pelo” son algúns dos calificativos que empregan os usuarios da autoestrada logo de que Audasa, a concesionaria da AP-9, subise o prezo da peaxe entre Redondela e Vigo o pasado 1 de xaneiro. Lonxe de liberalizarse este tramo, tal como estaba comprometido tanto polo actual goberno central como polo anterior, a tarifa sobe e pasa dos 0,95 céntimos a 1 euro. Un incremento de máis do 5% e que supera por moito a suba xeneralizada na Autoestrada do Atlántico, que é do 0,92%. Un “insulto para os veciños” segundo o presidente do colectivo, Marcial Pérez, xa que outros usuarios que fan un traxecto máis longo, entre Vigo e O Morrazo, gozan desde hai anos de gratuidade.

Marcial Pérez, presidente da Asociación de Veciños de Chapela

O goberno de Pedro Sánchez anunciara o pasado mes de outubro que se eliminaría a peaxe deste tramo, unha supresión vencellada á aprobación dos Orzamentos Xerais do Estado para este 2021, que xa tiveron luv verde do Congreso e do Senado o mes pasado.

Para o presidente da Asociación de Veciños, Marcial Pérez, o peor é o “trato discriminatorio” cos veciños de Chapela, xa que se trata “da única circunvalación de Vigo e de Galicia que é de pago”, e que mesmo é parte dun traxecto máis longo ata Moaña que é de balde. Unha situación que “non ten sentido” e que siguen a padecer os veciños de Chapela e Redondela.

Fartos das promesas incumpridas do goberno actual e dos anteriores, Pérez anuncia a posta en marcha dun calendario de mobilizacións “se a supresión da peaxe non se fai realidade de inmediato”. Advirte que, coas limitacións as que obriga a situación sanitaria pola Covid-19, emprenderán accións de protesta, e insta á veciñanza “a participar e mobilizarse”.

Hai anos que colectivos veciñais e sociais, empresarios e partidos políticos de distinta cor reclaman a eliminación desta peaxe que consideran “inxusta e discriminatoria”.

O PP esixe a supresión inmediata da peaxe

O deputado nacional do PP e ex alcalde Javier Bas esixe tamén ao Goberno central que libere “de xeito inmediato” a peaxe de Redondela, “e execute o compromiso que deixou o Goberno de Mariano Rajoy para levantar a peaxe desde 2018”. Advirte que levan “máis de dous anos de retraso” e que “non só o incumpren senón que ademais incrementan as tarifas”. Na mesma liña se pronuncia a voceira local do PP de Redondela, Carmen Amoedo, que critica ao PSOE “por ser incapaz de defender os intereses da provincia en Madrid, e tamén ao Goberno local de Redondela, porque consinte este insulto aos redondeláns”.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *