Hoxe é Luns 25 de Xaneiro de 2021

Leonardo Cabaleiro: “Para gobernar en minoría hai que ter cintura”

leonardo cabaleiro

A Agrupación local do PSdeG-PSOE de Redondela quere “cortar” posibles especulacións sobre as manifestacións realizadas por AER, nas que a agrupación que forma parte do goberno bipartito anunciaba que no vindeiro ano “decidirán se manterse no executivo local ou pasar á oposición”.

O secretario xeral dos socialistas redondeláns, Leonardo Cabaleiro, amosou a súa “sorpresa” por esta decisión, xa que se enteraron “polos medios de comunicación”. Cabaleiro sinala que “sempre mantiveron unha relación “transparente e de total colaboración para o bo funcionamento do goberno de coalición”.

Leonardo Cabaleiro, Secretario Xeral PSOE Redondela “Relación transparente e de colaboración”

O secretario xeral do partido en Redondela “respecta” as decisión que poida tomar AER e evita entrar a valorar os motivos da Agrupación de Electores, ao tempo que lles ofrece “un diálogo aberto e honrado” como mellor medio “para solucionar os posibles problemas”. Asegura que desde a formación socialista sempre cumpriron de xeito “escrupuloso” o acordo de goberno acadado hai ano e medio, e afirma que as relacións entre os concelleiros de ámbalas formacións sempre foron “fluídas, de absoluta normalidade e total colaboración”. Cabaleiro acredita a sobrada experiencia do seu partido en anteriores gobernos de coalición, sinala que o PSdeG-PSOE sempre se presenta ás eleccións “para gobernar”, e advirte que para iso “hai que mollarse e asumir responsabilidades”.

“Para gobernar hai que mollarse e asumir responsabilidades”

Recoñece que o labor de goberno da coalición en minoría “non é fácil”, ao precisar de acordos con outras formacións. Por iso destaca a importancia de ter “cintura” para negociar e chegar a un entendemento coas forzas progresistas. Confía en que o bipartito chegue “a bo porto” e poida rematar os catro anos de mandato xa que comparten un obxectivo común “o desenvolvemento de Redondela en todos os aspectos e devolverlle a normalidade democrática logo de anos de gobernos conservadores”.

Agarda que o bipartito poida rematar os catro anos de mandato

Finalmente, Leonardo Cabaleiro quere deixar claro o respaldo “total e sen fisuras” á xestión da alcaldesa de Redondela Digna Rivas e insistiu en estar “abertos ao diálogo tanto con AER coma con todas as forzas políticas que teñan unha visión progresista da sociedade”.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *