Hoxe é Sábado 5 de Decembro de 2020

O Campito F.S. prepara o inicio de liga en Terceira Nacional

CapitoSenior

Tras moitos meses afastados da competición, o equipo de Chapela comezará a liga o 15 de novembro ante o Baíña. Despois de acadar o ascenso enfróntase a unha temporada “moi diferente” por mor da crise sanitaria. Este domingo xogarán o seu primeiro amigable da pretemporada ante o IES Coruxo, ás 20.30 horas no pavillón González Soto, a porta pechada.

O club de Chapela estrea categoría, e faino con moita ilusión e traballo, segundo afirma o seu presidente Iago Fernández. Será unha liga moi diferente, na que deberán adaptarse non só á esixencia da Terceira División, senón tamén a todos os protocolos derivados da pandemia de coronavirus. Contan cun equipo “moi xoven” no que mesmo incorporan a algúns xogadores xuvenís.

Iago Fernández, presidente do Campito

A Federación establece dous grupos nesta categoría, e o Chapela F.S, está no sur, no que debería competir co Pazos de Borben FS, malia que o equipo de Pazos medita a súa retirada pola crise sanitaria da Covid. Unha decisión que Fernández “entenden e respecta” debido á responsabilidade que supón para os clubs amateurs competir condicionados pola pandemia. Outro dos conxuntos que medita non saír a competir é o Baíña, que sería o primeiro rival do Campito esta temporada.

Varios equipos rexeitan comezar a competición pola crise sanitaria

No club de Chapela todos os xogadores e corpo técnico pasou as probas con test e deron negativo á Covid-19. O compromiso dos equipos desta categoría é facer estas probas cada semana. Tamén seguen un estricto protocolo nos adestramentos, co uso de máscara e mantendo a distancia de seguridade. Ata o de agora a situación sanitaria non lles permitiu disputar ningún partido amigable, o primeiro será este domingo ante o IES Coruxo. Será unha boa ocasión para “testar” como está o equipo antes de comezar a competición oficial. O partido será ás 20.30 no pavillón Manuel González Soto, a porta pechada.

Categorías base

A federación galega de fútbol fixo entrega dos diplomas que acreditan ao equipo Infantil Galega Masculino e Cadete Feminino Galega campións de Liga Galega Sur da tempada pasada. Unha gran tempada de ambos os equipos, que mostraron a súa superioridade na pista durante os meses de competición. A base é “moi importante” para o club, pero os máis pequenos non poderán volver aos adestramentos polo de agora. Ademais do equipo sénior regresaron ao traballo o xuvenil de Liga Galega e o cadete de División de Honra. O resto de equipos, para os que non haberá competición, o club descarga polo de agora recuperar os adestramentos “non é doado compaxinar a práctica deportiva dos rapaces coa seguridade”.

Para o club esta nova temporada está a supoñer tamén un gran esforzo económico. O incremento dos gastos, cos test da Covid-19 e outro material de prevención, xunto coa diminución dos ingresos por publicidade e fichas está a facer que sexa un ano “aínda máis complicado”. Con todo, Fernández agradece a colaboración da Federación e o Concello de Redondela, que están a poñer “todo o que está na súa man” para que a práctica do deporte sexa “o máis segura posible”.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *