Hoxe é Domingo 1 de Agosto de 2021

O BNG critica a mercantilización da cotas da xouba

RR_Noticias

Os nacionalistas denuncian que embarcacións do xeito e racú de Redondela vense forzadas a mercar cota de xouba en Cádiz para manter a actividade. Lembran que o pasado mes de agosto pechábase a pesquería da sardiña para estas artes por terse esgotado a cota asignada na costa galega. Para manter a actividade a flota artesanal, ao igual que anteriormente o cerco, viuse forzada a mercar cota no sur da zona IX, comprendida entre Fisterra a Cádiz.

Esta práctica “imposta polas administracións ás embarcacións tradicionais supuxo un enfrontamento dentro do propio sector, entre aqueles que si mercaron cota e os que optaron por non entrar neste mercádeo, ou simplemente non tiñan capacidade económica para poder facelo”. Para o BNG trátase dunha medida que “ademais de inxusta e moi perigosa xa que abre a porta a branquear a privatización do mar” en palabras do responsable local nacionalista, Anxo Lusquiños.
Pola súa banda a Consellaría do Mar, ten habilitado unha cota de 4 toneladas de xouba para este primeiro trimestre do ano 2020, o que supón 1.000 kg menos que no ano anterior. “Unha cantidade moi baixa para que sexa rendible e que sen dúbida vai volver a obrigar a estas embarcacións a pasar por caixa novamente”, denuncia.
Consideran dende o BNG, que resulta moi pouco entendible que se lle limite a pesca da xouba a estas embarcacións na costa galega porque o “stock” está mal e unha vez que se merca a cota no golfo de Cádiz, xa se lle permita facelo sen problema.
“Todo esta senrazón incide negativamente nun sector estratéxico en Redondela, como o da pesca de baixura, que ano tras ano vai perdendo peso. O número de embarcacións diminuíu dun modo alarmante, mesmo poñendo en perigo a supervivencia desta actividade tan vencellada o noso concello, denuncia o responsábel do BNG.
Considera Anxo Lusquiños, totalmente inaceptable e inmoral que se teña que pagar para poder pescar, apostando por defender dende a Xunta o dereito universal a poder faenar de xeito sostíbel, independentemente da capacidade económica dos mariñeiros.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *