Hoxe é Sábado 24 de Outubro de 2020

Soutomaior reunirá á comunidade educativa do novo IES para tratar os problemas do centro

RR_Noticias

A corporación acordou reunirse coa comunidade educativa para demandar as melloras á Xunta de Galicia. Á sesión plenaria celebrada onte, a petición do BNG, acudiron varios pais de alumnos e representantes da ANPA co IES, que levan desde comezo de curso mobilizándose contra os problemas e os recortes do centro.

Entre as queixas das familias están a falta de auga quente nas duchas, a inexistencia dun patio cuberto para os días de choiva ou as reducidas dimensións da cafetería. En canto ao transporte escolar os usuarios do instituto denuncian a supresión de paradas. Segundo anunciou o alcalde, Agustín Reguera, a situación do novo instituto será debatida pola comunidade educativa “para obter unha análise real da situación en base ás conclusións dos implicados e dos profesionais da educación, non dos políticos”. O pleno extraordinario debatía a proposta presentada polo BNG de solicitar unha reunión coa Consellería de Educación para tratar a situación do novo IES de Soutomaior. Moción que finalmente se modificou tras a proposta do alcalde de reunir previamente a todos os axentes implicados. Segundo Reguera, “é necesario contar coa ANPA, cos representantes do centro e co consello escolar, para saber realmente cal é a súa opinión sobre o funcionamento do novo instituto antes de solicitar algo”. Durante a súa intervención, o alcalde defendeu o novo instituto cualificándoo como “un investimento exemplar” que supón “un gran avance para toda a comunidade educativa do municipio”. O voceiro do BNG, Manu Lourenzo, propuxo un acordo para que “dende o Concello se inste á Xunta a iniciar a fase 2 de construción do IES para que se solucionen estes problemas”. Unha proposta que, dixo, debe ser consensuada coa comunidade educativa.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *