Un helicóptero do 061 tomaba terra na xornada de onte na Avenida de Redondela logo de que se solicitasen os seus servizos dende o Centro de Saúde da parroquia a raíz dun paciente que presentaba unha doenza de tipo coronario. Para facilitar que a aeronave tomara terra efectivos da Policía Local e Protección Civil cortaron o tráfico na estrada que comunica Redondela con Vigo ante a mirada atónita de curiosos e veciños. Finalmente o paciente foi trasladado en ambulancia.
Unha insólita imaxe a que se espallaba onte polas redes sociais e á que asistían atónitos moitos veciños da N-552 e condutores que circulaban pola vía ao redor das dúas da tarde: a presenza dun helicóptero que tomaba terra en medio da estrada. Unha chamada do Centro da Saúde motivou a presenza da aeronave para atender unha urxencia médica, malia que finalmente o paciente foi trasladado en ambulancia.
