Hoxe é Domingo 13 de Xuño de 2021

Iván Vázquez: “Nesta segunda volta o Arealonga F.S. ten que saír do bache”

RR_Noticias

Transcorrida xa a primeira metade da competición na Liga Galega Sur, o equipo de Chapela está afundido na parte baixa da táboa. Logo do descanso de Nadal, e coa recuperación dalgúns dos seus xogadores, confían en mellorar resultados nesta segunda volta que comezan na casa co Verín.

O balance da primeira volta do campionato non é positiva para o Arealonga. Das quince xornadas de liga só suman tres vitorias e catro empates. Con 13 puntos están na 14ª posición da táboa, só por diante do Ourense Mariñamansa e o Celado, pechacancelas do grupo. O presidente e xogador, Iván Vázquez, advirte que agora teñen por diante toda a segunda volta para darlle a volta á situación. Recoñece que a traxectoria do equipo non foi boa, pero confía en “saír do bache” nesta segunda volta. Explica que o descanso de Nadal permitiulles recuperar a algúns xogadores, e pelexarán por saír da cola da táboa. Afirma que o traballo feito ao longo da semana nos adestramentos foi bo, e ve con optimismo a segunda metade da competición que queda por diante. “Mellorar os resultados da primeira volta non será difícil”, aventura Vázquez Figueroa. O seu primeiro rival será o Verín, e augura un encontro “moi disputado” xa que o ourensán é “un equipo forte”, segundo Vázquez. Actualmente son quintos na táboa, e en Chapela son conscientes de que precisarán o cen por cen de concentración durante todo o partido para sacar un resultado positivo. O partido será o sábado ás 18.30 no pavillón municipal de Chapela.
Categorías femininas
En canto ao fútbol sala feminino, no club apostan firmemente por todas as categorías, que van medrando desde o nacemento do Arealonga F.S. O presidente salienta o “bo traballo das rapazas” con excelentes resultados tanto na Liga Galega Cadete como na Liga Provincial.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *