Foto cedida por Os Cortizos
O responsable do centro de día Os Cortizos reclama con motivo do Día Mundial do Alzheimer – 21 de setembro – que esta enfermidade deixe de ser tratada como unha consecuencia inevitable da idade e pide ás administracións máis recursos para investigar e apoiar as familias.
O director do Centro de Día Os Cortizos, Pedro López, aproveita o Día Mundial do Alzheimer para lanzar unha mensaxe clara: a sociedade non debe normalizar unha enfermidade neurodexenerativa que afecta a millóns de persoas e que require máis investigación, atención e apoio ás familias.
López destaca que o Alzheimer non debe entenderse como unha consecuencia natural do envellecemento. “Non é normal ter unha enfermidade neurodexenerativa. Nin é normal, nin é síntoma de facerse maior”, afirma, diferenciando os cambios propios da idade dunha enfermidade que, aínda que aparece con maior frecuencia nas etapas avanzadas da vida, non debe asumirse como inevitable.
As estimacións da Sociedade Española de Neurología (SEN), recollidas nos datos oficiais, sitúan en 800.000 as persoas que padecen Alzheimer en España. Porén, o director de Os Cortizos advirte de que esta cifra pode ser superior debido aos casos que non se diagnostican ou nos que a detección da enfermidade se retrasa. López lembra, ademais, que o Alzheimer non afecta unicamente ás persoas que o padecen, senón tamén ás súas familias e ao seu contorno máis próximo. Segundo a SEN, a enfermidade concentra o 60% dos casos de demencia e preto do 30% dos casos permanecen sen diagnosticar.
Ante as previsións de crecemento da enfermidade e o aumento dos novos diagnósticos, López reclama un maior compromiso por parte das administracións, especialmente no impulso á investigación. Considera necesario reforzar os recursos destinados a avanzar no coñecemento do Alzheimer e no desenvolvemento de tratamentos que permitan facer fronte a unha enfermidade cunha importante incidencia social e familiar.
López lembra que, aínda que nos últimos anos se producen avances no coñecemento do Alzheimer e no desenvolvemento de tratamentos, aínda non existen solucións capaces de evitar ou atrasar de maneira definitiva a enfermidade.
O responsable do centro tamén advirte de que o Alzheimer está a afectar a persoas cada vez máis novas no seu día a día profesional. Aínda que menciona posibles factores relacionados coa medicación prolongada, o estilo de vida ou a alimentación, subliña que as causas son complexas e que é precisamente por iso polo que resulta tan importante continuar investigando.
Na súa reivindicación, Pedro López pon o foco na maneira na que a sociedade percibe as enfermidades que afectan principalmente ás persoas maiores. Considera que a idade das persoas afectadas contribúe a que o Alzheimer se asuma con demasiada normalidade, reducindo a presión para incrementar os recursos destinados á investigación.
A mensaxe do director de Os Cortizos esténdese igualmente á situación das persoas coidadoras. López lembra que as familias afrontan gran parte da atención diaria das persoas con deterioro cognitivo e que, en moitas ocasións, non reciben a formación nin o acompañamento necesarios.
O responsable reclama unha maior coordinación entre os servizos sanitarios, os especialistas e os recursos de dependencia, así como máis orientación para as familias desde o momento do diagnóstico.
