A entidade conmemora o seu 50 aniversario cun programa especial que inclúe unha nova identidade gráfica, a publicación dun libro histórico e unha homenaxe ás persoas que fixeron posible cinco décadas de traballo colectivo.
A Asociación de Veciños de Chapela cumpre en 2026 cincuenta anos desde a súa constitución legal, un aniversario que a entidade quere converter nunha homenaxe á historia do movemento veciñal e ao papel desempeñado por centos de persoas na transformación da parroquia. A efeméride coincide co medio século dunha organización que, segundo destaca a propia asociación, mantén intacto o seu compromiso coa defensa dos intereses de Chapela, do seu patrimonio, do litoral e da identidade local.
Aínda que a súa legalización produciuse o 3 de agosto de 1976, a orixe da entidade remóntase a 1974, cando un grupo de veciños decidiu organizarse para reclamar melloras nun contexto no que aínda non existían as actuais liberdades democráticas. Desde entón, a asociación converteuse nun dos principais motores das reivindicacións sociais e urbanísticas da parroquia.
Ao longo destas cinco décadas, a entidade participou activamente na consecución de importantes infraestruturas e servizos que marcaron a evolución de Chapela. Entre os logros que destaca figuran a chegada da auga potable e do saneamento, a construción do instituto, do centro de saúde, do pavillón polideportivo e do edificio multiúsos, así como a mellora das comunicacións e do transporte público ou a creación da Alameda.
A defensa do patrimonio natural e histórico constitúe outro dos piares da súa traxectoria. A asociación lembra o seu papel na protección de espazos como o Piñeiral do Crego e a praia de Arealonga, ademais da conservación de elementos patrimoniais e etnográficos. Tamén subliña a súa implicación na creación da Comunidade de Montes e na recuperación de diferentes espazos naturais da parroquia.
Especial protagonismo ocupa tamén o compromiso ambiental. Durante estes anos, a entidade participou en mobilizacións contra proxectos industriais e portuarios que consideraba prexudiciais para a Enseada de San Simón e o litoral de Chapela, ademais de impulsar campañas de limpeza de ríos e praias e outras actuacións de conservación ambiental.
Con motivo deste 50 aniversario, a Asociación de Veciños presentou unha programación especial que inclúe a próxima publicación dun libro que recompila, por primeira vez, a historia da entidade desde a súa fundación ata a actualidade. A obra reúne fotografías, documentos históricos, actas, recortes de prensa, planos e testemuños que permiten reconstruír a evolución da parroquia e das principais loitas veciñais das últimas cinco décadas. A edición contou coa colaboración da Deputación de Pontevedra e do Concello de Redondela e a súa presentación anunciarase nas próximas semanas.
Coincidindo coa celebración, a entidade quixo agradecer publicamente a implicación de todas as persoas que formaron parte da súa historia: presidentes, integrantes das distintas xuntas directivas, persoas socias, colectivos sociais, culturais e deportivos, así como aos medios de comunicación e á veciñanza que participou nas numerosas iniciativas desenvolvidas ao longo destes cincuenta anos.
