As doce mulleres participantes na formación financiada polo Concello de Redondela cun investimentos de 13.000 euros recibiron hoxe o seu diploma. A formación foi impartida polo Director Técnico do Grupo Eurored e desenvolveuse ao longo dos dous últimos meses.
O Concello de Redondela e o Grupo Eurored celebraron hoxe o acto de clausura e entrega de diplomas do curso de formación técnica en redería dirixido a mariscadoras locais. Esta iniciativa pioneira, que contou coa participación de 12 mulleres, remata tras dous meses de aprendizaxe teórica e práctica nas instalacións da empresa redondelá.
As alumnas recibiron o título que certifica os seus coñecementos en construción, montaxe e reparación de artes de pesca. O curso, impartido polo Director Técnico de Grupo Eurored, Javier Blanco, permitiulles dominar desde o uso de materiais e fibras ata cálculos de montaxe e técnicas de corte e confección.
A alcaldesa de Redondela, Digna Rivas, destacou a importancia estratéxica desta iniciativa que ofrece ás mariscadoras unha alternativa de emprego nun oficio con moita demanda”. Un proxecto financiado pola área de Igualdade con máis de 13.000 euros, exemplo da colaboración público-privada xa que foi posible grazas á colaboración con Eurored.
Ao acto de clausura tamén asistiron o concelleiro de Emprego, Alberto Álvarez, así como responsables do Grupo Eurored, quen reafirmaron o seu compromiso co fortalecemento do tecido laboral de Redondela.
