O Club de Atletismo de Redondela vén de recoller tres títulos de subcampións no Campionato Galego Máster en Pista Curta celebrado a fin de semana pasada en Expourense.
Antón Amoedo conseguiu o segundo posto na categoría M50 en 3000 metros (10:31.33), José Andrés Fervenza na categoría M55 en 3000 metros (11:27.12) e Ana Romasanta en F40 Lanzamento de Peso cun resultado de 5,01 metros.
Ademais, no mesmo espazo de Expourense, celebrábase tamén o Campionato Galego Absoluto en Pista Curta onde Gael Couñago gañou a medalla de prata Short Track en Salto de Altura cunha marca de 1’87 metros.
Sen embargo, non todo foron alegrías esta pasada fin de semana para o CAR. O atleta Alex Alfaya lesionouse mentres disputaba a proba do 200 m na Competición Absoluta en Pista Curta.
