Atrasos no inicio dos cursos, falta de docentes, escasa publicidade e un proceso de selección manifestamente mellorable, son algunhas das irregularidades enumeradas pola concelleira do PP, Ana Alonso, na sesión extraordinaria celebrada onte a petición do seu grupo. Unha sesión na que se atopou de fronte ao resto dos grupos quen argumentaron que no proceso non interveñen os grupos políticos e están en mans de funcionarios.
Ao longo dunha prolongada intervención Ana Alonso fixo un percorrido polo que cualificou de “numerosas irregularidades” na convocatoria, no proceso de selección e na posta en marcha dos dous obradoiros de emprego – o Redondela TIC III e o Redondela máis que bela IV- que están a día de hoxe funcionando en Redondela e que contan cun orzamento da Xunta de Galicia de preto de un millón de euros. Ademais de poñer o foco nas preguntas e o proceso desenvolvido para a elección do alumnado traballador, que segundo dixo deu lugar a numerosas reclamacións, salientou que non se respectaron os principios de publicidade, concorrencia e transparencia esixidas na convocatoria, o que supuxo que moitas persoas interesadas non puideran acceder aos mesmos. Por todo isto, instaban á alcaldesa a depurar as responsabilidades oportunas pola xestión realizada nestes dous obradoiros de emprego.
O edil de AER, Roberto Villar preguntáballe aos populares que se “tan mal estaba todo o proceso, por que non o denunciaron ante Xunta de Galicia, que é quuen ten a capacidade de suprimir os obradoiros ou investigalos”.
Dende o BNG, David Couñago, criticaba que o PP presente agora esta moción “cando na comisión correspondente non fixeron ningunha proposta” e lembraron que as mesas están conformadas por funcionarios “nos que nós confiamos plenamente”. Aproveitaron tamén para criticar unha formación que a Xunta “está a empregar para maquillar os ratios do paro e para facer obras no concello”. Puxo como exemplo a rotonda de Cabanas ou o axardinado da parcela ocupada no pasado pola casa de Fenosa.
O responsable do departamento de emprego, Antonio Cabaleiro, afirmou que moitas das irregularidades denunciadas polo PP “son responsabilidade directa da Xunta e non do Concello” e insistiu tamén en que as preguntas e o proceso –tan criticado polo PP- foron feitas polos funcionarios.
Pechaba a súa intervención Ana Alonso argumentando que “non denunciamos para evitar que este alumnado quedara sen estes obradoiros que lles permitirá cobrar un salario durante un ano”.
