Co gallo do Día Mundial da Saúde Mental, a Asociación Lenda está a celebrar uhha xornada festiva e reivindicativa na Praza Alejandro Otero. Baixo o lema da Federación de Saúde Mental Galicia “Saúde Mental, Saúde Mundial, Un dereito Universal” organizan unha serie de actos que continuarán ao longo da tarde. Ao mediodía Patri foi a encargada de ler o manifesto de Lenda no que lembran que “a saúde mental é un dereito inherente á condición humana”
Entre as reivindicacións de Lenda poñen tamén o foco no dereito á vida, e demandan “campañas de sensibilización e prevención do suicidio no ámbito escolar, universitario e laboral”
A asociación demanda “un enfoque global” para o coidado da saúde mental, e sinala que todo o que se faga a favor de mellorar neste ámbito “redundará nunha sociedade con benestar”.
O acto celebrado esta mañá serviu tamén como presentación do nº 43 da revista A Voz de Lenda, adicada nesta edición á Violencia. Antonio García e Quino foron os encargados de ler a editorial deste número, na que explican que “o responsable da violencia non é necesariamente quen a exerce” e apunta á pobreza, o desemprego ou a falta de oportunidades.
A editorial apunta que sistema capitalista “non pode existir sen violencia” e convida ao lector a pensar nas causas e no por que dos actos violentos.
Usuarios de Lenda leron tamén algúnhas das poesías publicadas na nova revista. Nito puxo voz a un texto de Gonzalo Rodríguez Bastón, compañeiro de Lenda falecido recentemente ao que dedicou unhas emotivas palabras.
O seu poema titulado “Violencia é violencia” fala da guerra de Ucraína e do absurdas que son as guerras que só deixan morte e dor.
Nieves, encargada de presentar o acto, deu paso á instalación artística “As árbores do compromiso”, no que usuarios de Lenda, familiares e veciños da vila colgaron mensaxes nas árbores da praza cos compromisos que se precisan para acadar os dereitos universais en Saúde Mental.
Ao longo da tarde, de 16:30 a 19:00 horas, na Praza Alejandro Otero continuarán as actividades acompañadas de música e petiscos para os asistentes.
