Chapela acolleu esta semana os II encontros dos Comandos de igualdade que funcionan na provincia de Pontevedra. Entre os participantes atopábase a Brigada Violeta que funciona dende o 2020 no IES de Chapela realizando actividades que fomentan a igualdade e a diversidade afectivo sexual no centro.
Formado por profesorado e alumnado organizan e fan propostas que queren responder ao que observan nas aulas “condutas sexistas, machistas, negacións incluso do que é o feminismo e o igualdade, así como condutas moi dispares no que respecta ao xénero, manténdose en moitos casos os estereotipos entre mozos e mozas… ao final os centros educativos son un reflexo da sociedade na que vivimos” explica unha das profesoras participantes e orientadora do Centro, Tamara Bermúdez Garea.
Malia recoñecer que “resta moito camiño por facer” tamén subliña que “é moi difícil a día de hoxe determinar se hai máis ou menos machismo porque agora a sociedade observa o que nos rodea dende outro punto de vista e dende unha perspectiva de xénero o que fai que nos decatemos de todos eses comportamentos machistas que sempre se produciron pero que actualmente si temos capacidade de recoñecer e reaccionar”.
A Brigada Violeta naceu coma un espazo no que os e as participantes se sintan respectados e con liberdade para facer aquelas propostas que consideren necesarias para traballar na igualdade e tamén organizando actividades de formación “para desaprender moitas cousas que temos interiorizadas”. Outro dos seus cometidos é organizar actos para conmemorar diferentes celebracións como por exemplo a realizada o pasado 25N cun acto simbólico en resposta ao lamentablemente popular vídeo machista que fora protagonizado polos alumnos do colexio de Maior Elías Ahúja de Madrid.
