O auditorio do Multiúsos da Xunqueira encheuse de xente de todas partes de Galicia para celebrar a final do concurso Voces de Redondela. O evento, organizado pola soprano Pilar Moráguez foi un éxito de participación cun total de 10 finalistas entre 9 e 17 anos que tiveron que baterse en directo para conseguir unha bolsa de canto valorada en 1.200 euros.
O concurso desenvolveuse a través de dúas probas eliminatorias con voto popular. O proceso seguíase a través da páxina web do concurso e tivo unha resposta de 1127 votos únicos contabilizados. Unha vez na gala final o público tiña que votar de forma presencial na sala ás 3 mellores voces. Conseguiron pasar esta proba eliminatoria Julia Feás (Santiago de Compostela), Lucía Castro (Arcade) e Jorge Enrique Pazó (Vigo). Moráguez quere destacar que “foi un proceso moi dinámico no que o público interactuou cos concursantes e creouse un ambiente de motivación. Todo o mundo recibiu feedback positivo, con aplausos e apoio da xente de Redondela e dos visitantes”.
Os resultados das votacións foron moi axustadas e para que os familiares presentes non manipularan as votacións era obrigatorio dar puntos a todos os concursantes. Unha vez pasada a primeira eliminatoria, os tres finalistas tiñan que volver a cantar e un xurado profesional foi o encargado de rematar as votacións.
Pilar Moráguez quere “agradecer a colaboración do comercio local na entrega de premios “para que todos e todas levaran un recordo consigo”. Os locais da vila aportaron axendas para todos os finalistas, flores para todos os participantes, bolsas de agasallos con doces, diplomas personalizados e xoguetes, entre outros detalles. O Concello de Redondela, quen tamén estaba presente a través da visita da alcaldesa Digna rivas, aportou mochilas con agasallos dentro.
O xurado estivo formado polos músicos redondeláns Alberto Vilas e Fran López, a profesora do Conservatorio Superior de Vigo Beatriz Riobó e o pianista Arabel Moráguez. Estes valoraron a actuación en directo, a posta en escena e por suposto a voz e a habilidade para cantar e destacaron que “o máis bonito e ver canto talento teñen os cativos e cativas en Redondela e en Galicia”.
Os resultados da primeira parte da gala:
1- Jorge Enrique Pazó 7,67
2- Lucia Castro 7,07
3- Julia Feás 7,03
4- Hanna Fikirte 6,16
5- Ana Anselin 6,12
6- Manuel Campo 5,28
7- Saúl Amoedo 4,35
8- Anabella Madrigal 4,08
9- Noa Vaz 3,88
10- Tiago González 3,07
Resultados da final:
1-Julia Feás 29
2-Lucia Castro 28
3-Jorge Enrique Pazó 24