A Asociación de empresarios destaca a porcentaxe de inserción dos participantes que finalizaron o programa e que chega ao 64% “superando en case 20 puntos porcentuais os obxectivos iniciais”. Destacan tamén o alto grado de calidade dos contratos.
Entre os colectivos participantes no programa compre destacar os resultados de inserción acadados polas mulleres, un 72,5% dos contratos reúne os criterios de inserción e o 85% foi contratada ao longo do programa. Outro dos colectivos que destaca en canto a resultados de inserción son os menores de 30 cualificados que acadaron un nivel de inserción do 60% “o que demostra o interese das empresas locais por captar talento”.
Explican dende a Asociación que o compromiso coa formación e o desenvolvemento da autonomía foi clave en todo o programa, ao que contribuíu de forma destacada o programa de mentorización desenvolvido nas primeiras fases, acadando resultados especialmente destacables no colectivo de menores de 30 sen cualificación.
A adquisición de experiencia a través de prácticas non laborais que contou coa colaboración de importantes empresas da comarca e de pequenos empresarios locais foi un instrumento que permitiu optimizar o proceso de sincronización entre oferta e demanda de traballo e atender mellor as dificultades que o sector empresarial está atopando para cubrir postos de traballo.
Fan unha mención especial a Partenón, unha das empresas destacadas nesta colaboración, non so contratando a persoal do programa senón tamén acollendo sesións prácticas que permitiron aos usuarios adquirir a visión real dos procesos da empresas.
