Hoxe é Xoves 28 de Marzo de 2024
Stations
NOTHING FOUND!
Current listeners: 
Peak listeners: 

Crise de goberno en Redondela

Digna

A socialista Digna Rivas accedeu á alcaldía co apoio de AER, socios de goberno, e o BNG

A decisión da alcaldesa de retirar a competencia da limpeza das praias a AER abre unha fenda no goberno bipartito. A Agrupación de Electores denuncia que Rivas impuxese o seu criterio na xestión dos areais, o que consideran unha ruptura “unilateral” do acordo de goberno. Por iso esixen ao PSOE un relevo na alcaldía “que permita manter o pacto de goberno entre socialistas e AER”.

A Agrupación de Electores recibiu con “sorpresa” a decisión de Digna Rivas de retirar ao concelleiro Roberto Villar a competencia sobre a limpeza de praias e medio mariño. O socialista Ignacio González asumiu o sábado esa xestión, comezaron os traballos de retirada de algas dos areais. Rivas xustificou esta decisión “para dar resposta ás reclamacións da veciñanza sobre a limpeza dos areais”. Xosé Carlos Orge “Cuni”, voceiro de AER, recoñece que os socios de goberno teñen “diferentes criterios sobre a xestión das algas nas praias”, e critica que a alcaldesa quixese “impoñer o seu” cando esta área era do departamento de Medio Ambiente. Orge advirte que “este non é o xeito de proceder se quere darse estabilidade ao goberno bipartito”. AER lamenta que unha cuestión que non é un tema “capital” poida traer consecuencias na gobernanza de Redondela

Xosé Carlos “Cuni” Orge, da Agrupación de Electores

AER sinala que as actuacións levadas a cabo na praia de Cesantes esta pasada fin de semana “non só van en contra do proxecto medioambiental de AER, senón tamén do propio programa electoral do PSdeG-PSOE”. Explican que esta limpeza con maquinaria pesada “fai perigar a concesión dunha subvención de case 200.000 euros do Ministerio de Transición Ecolóxica presentada entre a Universidade de Vigo, o Concello de Redondela e a Confraría de Pescadores e mariscadoras de Redondela”.

Reunión dos socios de goberno

A Agrupación de Electores de Redondela reunirase nas próximas horas co PSOE para avaliar a actual situación do goberno municipal. Para AER a primeira opción é “manter o pacto de goberno”, pero advirten que esta continuidade pasa “por un relevo na alcaldía”. Recoñecen que perderon a confianza en Digna Rivas, e seguir no goberno con ela á fronte sería “practicamente imposible”. Deixan o balón no tellado do grupo socialista “que debe buscar unha alternativa”.

A primeira opción de AER é manter o pacto de goberno cun relevo na alcaldía

A Agrupación tomou esta decisión logo dunha xuntanza urxente dos seus membros celebrada onte domingo. Afirman que é unha resposta “meditada dende a calma” e que adoptan “por responsabilidade co electorado redondelán” xa que o seu compromiso era favorecer un goberno alternativo ao PP.

Orge explica que AER adopta esta decisión “por responsabilidade coa veciñanza”

Os socialistas, con Digna Rivas como alcaldesa, contan con sete edís na corporación. A investidura foi posible en 2019 grazas aos tres votos de AER, actuais socios de goberno, máis os dous do BNG. O partido máis votado foi o PP, con nove concelleiros.

Facebook
Twitter
LinkedIn
Pinterest
WhatsApp

Deixa unha resposta

O teu enderezo electrónico non se publicará