Hoxe é Venres 23 de Xullo de 2021

Redondela duplica os casos de Covid e entra en risco alto

sdr

A relaxación das restricións nesta fase de desescalada deixa no conxunto de Galicia un incremento de casos. Pontevedra é a cidade con maior incidencia, pero noutros municipios como Redondela o incremento de casos é tamén moi preocupante. Na pasada semana, do 27 de xuño ao 4 de xullo, os novos casos activos case se duplicaron, pasando de 25 a 49. Segundo os datos do Sergas a incidencia acumulada en Redondela sitúase neste momento en 168 novos contaxios por cada 100.000 habitantes, o que supón entrar no nivel alto de risco de contaxio, segundo o semáforo do Consello Interterritorial do Sistema Nacional de Saúde. Isto implicaría o peche de todo o lecer nocturno e a prohibición de celebrar verbenas e eventos populares. A decisión terá que tomala hoxe o comité clínico na súa reunión semanal dos martes.

Vigo é outro dos municipios da área onde máis está a subir a incidencia acumulada e dispárase 38 puntos nunha semana para situarse en 89. Con todo, os datos de incidencia a 14 días están aínda lonxe do limiar de 150 que implicaría o peche do lecer nocturno

No conxunto de Galicia os casos activos aumentan ata os 2.466, cunha suba do 38,9 % nunha semana. As infeccións activas por coronavirus seguen á alza en todas as áreas sanitarias menos en Ourense. Especial preocupación deixan as cifras de Pontevedra, onde soben en 55 casos activos máis nas últimas 24 horas. A presión asistencial sofre un incremento e hai 11 persoas na unidade de críticos (+1). As xerencias de Ourense e de Vigo teñen libres as camas de UCI nos seus hospitais. Hai 50 persoas ingresadas en planta, nove máis das que había na xornada previa.

A policía dispersa un “botellón” en Cesantes

O número de casos dispárase en certas zonas e en certos tramos de idade. Unha situación que preocupa aos expertos, que poñen a ollada nos “botellóns” e festas como principais focos de contaxio. Non se desbotan propoñer que a partir de certa hora, se pechen aquelas zonas onde se producen esas xuntanzas nas que non se respectan as medidas sanitarias. Precisamente en Redondela axentes da Policía Local e Policía Nacional tiveron que dispersar un “botellón” cuns 200 participantes no peirao de Cesantes. Produciuse na noite do sábado ao domingo. Dáse a circunstancia de que na xornada do sábado celebrouse o Choquiño Urban Jam, con gran número de participantes e público. Desde a organización confirman que durante o evento se respectaron todos os protocolos sanitarios, co uso de máscara e distancia de seguridade. Pero unha vez rematado o festival moitos dos asistentes desprazáronse á zona do peirao, onde se celebrou un “botellón” que precisou da intervención policial.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *