Hoxe é Luns 2 de Agosto de 2021

As protestas polos incumprimentos na AP-9 escóitanse en Pontevedra

ManiPonte

Ducias de veciños de Chapela e Teis levaron onte a Pontevedra as súas reivindicacións sobre a autoestrada. Levan meses agardando por unha xuntanza co delegado do Goberno en Galicia. Ante a falta de resposta por parte de Manuel Miñones, os colectivos veciñais decidiron trasladar as súas protestas á capital da provincia. Na mañá de onte concentráronse ante a Demarcación de Estradas e tamén ante o edificio da Subdelegación do Goberno. Esixen que o Ministerio de Transportes cumpra cos compromisos adquiridos desde hai anos coa veciñanza, como a supresión da peaxe no tramo Redondela-Vigo. Outras demandas son a instalación de pantallas acústicas para mitigar o ruído “enxordecedor” que produce a autoestrada ao seu paso por Chapela e Teis, a conversión en tramo urbano desde as Torres de Padín e a realización das obras da addenda en Chapela. Marcial Pérez, presidente da Asociación de Veciños de Chapela, lembra que estas melloras “están comprometidas polo Ministerio de Transportes e Audasa desde hai anos, pero só recibimos boas palabras e nunca feitos”. Os veciños cualifican de “burla” o comportamento do Ministerio e da empresa concesionaria “que seguen sen poñer unha data concreta para a realización das melloras”. Pérez advirte que xa non cren “ningún anuncio” e que continuarán coas protestas e as mobilizacións “ata que desaparezan as cabinas da peaxe en Rande”.

Marcial Pérez, presidente da Asociación de Veciños de Chapela
Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *