Hoxe estreamos a segunda fase do proxecto radiofónico “Xela a diario”, organizado polas Bibliotecas Municipais de Redondela, dirixido pola narradora e dinamizadora cultural Ana Facchini. Destacados convidados da cultura falarán sobre a vida e a obra de Arias, a quen moitos deles coñeceron persoalmente. No primeiro dos espazos “Voces amigas” contamos coa escritora e catedrática de lingua e literatura María Xosé Queizán. Esta programación de homenaxe a Xela Arias emitirase na Radio Municipal de Redondela do 3 ao 17 de maio, de luns a domingo, ás 12.00 e ás 17.00 horas. Poden escoitalo no 94.9 da FM e na internet en radioredondela.com. Os podcast estarán dispoñibles tamén a través da páxina web de Radio Redondela e no seu Facebook.
