Hoxe é Martes 11 de Maio de 2021

Un problema polo desnivel da rúa obriga a retirar o monumento aos represaliados

AltoConcheira

Tan só 24 horas despois da súa inauguración, o monumento aos represaliados do franquismo instalado no Alto da Concheira foi retirado. Sorpresa e malestar por parte da veciñanza ante esta situación, que desde o Concello de Redondela xustifican pola necesidade “de axustar a base da escultura por un problema de desnivel na rúa”. A obra, realizada pola Escola de Cantería da Deputación de Pontevedra, foi trasladada por un camión de volta á Caeira (Poio) para corrixir ese desnivel. A escultura, de 5 toneladas de peso, “estará de volta no seu emprazamento o vindeiro luns” segundo explicou esta mañá a alcaldesa Digna Rivas.

Os grupos políticos da oposición criticaron este feito, malia que cun ton diferente. O BNG manifesta nas redes sociais o seu “malestar” pola retirada do monumento. O grupo nacionalista acolleu “con grande satisfacción” este recoñecemento ás vítimas da represión. A súa retirada 24 horas despois da inauguración é para o Bloque un feito “lamentable e vergoñento”. Desde o BNG confían en que “á maior brevidade posible” se restitúa o monumento. Desde o PP tiran de crítica á alcaldesa, Digna Rivas, “por inaugurar o monumento sen rematar, á présa e correndo para saír na foto”.

O monumento fora inaugurado no Alto da Concheira o mércores,14 de abril, coincidindo co 90º aniversario da proclamación da II República. Nas inmediacións dese lugar foron asasinadas 21 persoas pola represión franquista. A peza escultórica de granito está composta por tres grandes siluetas humanas cun burato no peito.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *