Hoxe é Martes 11 de Maio de 2021

A Policía Local denuncia “falta de medios” para protexer ás vítimas de violencia machista

policiaRedondela

Axentes do corpo redondelán advirten que carecen “dos medios e o persoal necesario para dar a cobertura que precisan as vítimas”, logo de que a comezos de ano o Concello renovase o acordo de colaboración entre a Policía Nacional e Policía Local no marco do programa VioXén. Trátase dun servizo “integral” de protección ás vítimas que recolle o reparto de funcións e asignación de vítimas, e adecúase ás referencias normativas actuais. A Policía Local explica que xa puxeron en coñecemento do Goberno local, un mes antes, “a precariedade de medios, a falta de efectivos, e a necesidade de formación actualizada para dar a protección que o novo protocolo establece e que obedece a nova normativa comunitaria, estatal e europea”. O programa esixe espazos reservados para garantir a privacidade das vítimas, dos que non dispón a comisaría de Redondela, ou ter un teléfono 24 horas para atención das vítimas. Os axentes sinala que, a día de hoxe “non se recibiu contestación e trabállase con precariedade absoluta de medios que se tentan paliar con todo o esforzo do cadro de persoal”. Actualmente son 29 os axentes cos que conta a Policía Local.

Os datos oficiais, de xaneiro deste ano, recollen 41 casos activos de violencia de xénero en Redondela, segundo datos recollidos no Sistema VioXén, o programa de seguimento integral de vítimas. Esta cifra supón case o 75% do total de casos activos en todo o partido xudicial, do que forman parte tamén Soutomaior, Fornelos de Montes e Pazos de Borbén, e que aglutina o 2,76% das denuncias rexistradas na provincia de Pontevedra. O 68% das vítimas da localidade son menores de 45 anos.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *