Hoxe é Mércores 4 de Agosto de 2021

O PP propón negociar un orzamento municipal para que entre en vigor este ano

CarmenAmoedo

O grupo municipal do PP de Redondela considera “inaprazable” que o goberno local presente un borrador dos orzamentos e ofrecen a súa colaboración “para impulsar axudas reais para Pemes e autónomos, e aumentar as partidas de carácter social, co obxectivo de paliar os efectos da pandemia”. A voceira popular, Carmen Amoedo, trasladará á alcaldesa Digna Rivas, a súa proposta de colaboración na elaboración duns orzamentos para o Concello “que poidan ser aprobados canto antes e que se apliquen este mesmo ano”. Lembran que son “o grupo maioritario da Corporación” polo que entenden que a súa responsabilidade “é facilitar ao máximo a aprobación dun orzamento con visión de futuro, traballando para mellorar a vida dos cidadáns e superando diferenzas políticas”. A proposta de Amoedo para negociar as contas municipais baséase en catro eixos: unha partida destinada á recuperación laboral e económica con axudas ao comercio local, autónomos, Pemes, emprendedores e sector hostaleiro e turístico; aumentar a dotación para accións de ámbito social para persoas en risco de pobreza ou de exclusión, incidindo na reinserción laboral; a realización dos investimentos municipais previstas en proxectos para Redondela e que contan coa cofinanciación doutras administracións; e por último artellar un sistema consensuado que dea solución á retribución do persoal municipal, con especial atención á situación da Policía Local, por traballos que realicen para os cidadáns fóra do seu horario laboral.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *