Hoxe é Xoves 3 de Decembro de 2020

Redondela recomenda restrinxir as visitas aos cemiterios e a mobilidade entre concellos

mañó

Reforzarase a presenza policial nas entradas e saídas de Redondela para garantir que se respecta o peche perimetral que a Xunta vén de decretar en Vigo e que establece a prohibición de entrar e saír da cidade veciña dende hoxe ás 15:00 horas e ata, aló menos, o martes. Regúlanse tamén as visitas aos cemiterios co gallo da celebración de Todos os Santos o vindeiro domingo e dende a alcaldía recoméndase que, co gallo de protexer aos nosos maiores, se reduzan no posible as visitas aos Centros de Día e Residencias. Digna Rivas fai un chamamento á responsabilidade de todos para tentar cortar o espallamento do coronavirus “ante unha situación complicada e decisiva para frear os contaxios”.

Digna Rivas fai un chamamento aos veciños para reducir os contactos sociais

A situación en Redondela mantense estable, en alerta vermella pero sen gromos preocupantes o que non fai necesario novas restricións como as que se veñen de decretar para o Concello de Vigo e as grandes cidades galegas que quedan confinadas perimetralmente e reducen os contactos sociais ás persoas conviventes. Así llo comunicaba o conselleiro de sanidade, Julio García Comesaña, a alcaldesa Digna Rivas na mañá de hoxe. Con todo, dende o Concello optan por facer un chamamento á responsabilidade nunha fin de semana complicada e aconsellan frear a mobilidade para evitar así que o número de contaxios continúe escalando.

Controis nos cemiterios para evitar aglomeracións

Neste sentido, a alcaldesa recomenda “minimizar as visitas aos cemiterios e que, de facelas, sexan de xeito escalonado, fóra das horas punta e evitando aglomeracións”. Tamén se recomenda que as visitas sexan o máis breve posible e se respecten as indicacións en canto ao sentido da marcha, indicacións que xa están visibles nos cemiterios municipais de Mañó e Os Eidos. De cara a cumprir coas medidas sanitarias haberá tamén un operativo especial de Protección Civil e Policía Local, que se estenderá aos cemiterios parroquias para garantir o cumprimento do protocolo da Xunta de Galicia.

Por outra banda insiste na necesidade de evitar viaxes a localidades veciñas “a Vigo xa non podemos ir, pero tamén recomendamos non achegarnos a outros concellos limítrofes para non expoñernos a ningún risco” e, de cara a protexer aos nosos maiores o consello é claro “limitar as visitas tanto a Centros de día como as Residencias de maiores”.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *