Hoxe é Martes 27 de Outubro de 2020

O Ángel Barros máis crítico e reivindicativo, na Xunqueira

IMG_20201002_202514

Máis de medio cento de obras, entre cadros e instalacións, que denuncian inxustizas, as guerras e as súas consecuencias, os refuxiados, o capitalismo, a represión franquista, o deterioro do medio ambiente ou a destrución do patrimonio. Chama a reflexionar a través de pinturas universais de artistas como Rafael, Delacroix, Goya ou Zurbarán. Unha exposición que se pode visitar até o 15 de novembro no multiúsos e que o propio Barros dará a coñecer a través de visita guiadas en grupos reducidos nas mañás dos mércores e venres.

Malia ser a cuarta vez que o redondelán Ángel Barros expón a súa obra en Redondela, nunca o fixera como agora. O Barros máis crítico, máis comprometido preséntase nesta exposición “A arte como pensamento crítico” na que reflexiona sobre algúns dos principais problemas da humanidade como as guerras, os exiliados e os milleiros de persoas que cada ano morren no Mediterráneo. Unha realidade, que Barros presenta a través dun cadro do neno sirio Aylan xunto a unha reprodución de “A balsa da Medusa” de Géricault.

Artista redondelán Ángel Barros. Os exiliados e refuxiados son o punto de partida da mostra.

De aí partiu o artista e restaurador redondelán para falar doutros temas como as clases sociais e a opresión, a través do cadro de Paolo Veronese “As vodas de Caná” acompañado pola lenda “se non queres que haxa amos, négate a ser criado”. Non faltan alusións á situación política actual cun dólar coa cara de Donald Trump ou un cadro sobre a fotografía do miliciano de Robert Capa acompañado polo texto “Levamos 40 anos gobernados polo PPOE e as persoas defensoras da República aínda están nos campos, barrancos e cunetas”.

Unha mostra, que se inauguraba este venres ante medio cento de persoas, e na que Ángel Barros reivindicou a necesidade de coidar e conservar o patrimonio cultural e arquitectónico de Redondela así como a creación dun museo para difundir a riqueza artística e cultural do noso municipio que conta con numerosos representantes de prestixio no ámbito das artes e a cultura.

Destrución do patrimonio de Redondela. Ángel Barros.

Un acto no que a alcaldesa de Redondela, Digna Rivas, destacaba a calidade do traballo de Barros e o orgullo que supón para Redondela. Un home, que como lembraba o concelleiro de Cultura, Daniel Boullosa, foi autodidacta e rematou facendo restauracións de lenzos para o Louvre.

Alcaldesa de Redondela, Digna Rivas
Concelleiro de Cultura, Daniel Boullosa

A mostra, que tamén abarca o seu traballo como restaurador, así como reproducións e obras propias, pode visitarse no Multiúsos da Xunqueira até o 15 de novembro. O propio artista fará visitas guiadas os mércores e venres en horario de mañá. É preciso anotarse previamente na Oficina de Turismo do Concello de Redondela.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *