Hoxe é Mércores 21 de Outubro de 2020

A piscina de Redondela recibe aos usuarios con fortes medidas sanitarias e de hixiene

RR_Noticias

Logo de tres meses coas instalación pechadas por mor do estado de Alarma, este centro deportivo que xestiona a empresa Serviocio abría as súas portas o pasado luns con moitas incógnitas sobre a resposta dos usuarios. E parece que había gañas. Os amantes do deporte regresaron paulatinamente estes días tanto ao ximnasio como a piscina nunhas instalacións preparadas para garantir a seguridade sanitaria, con limpeza continuada, dispensadores de hidroalcol e aforo limitado, ademais de horario preferente para os maiores de 65 anos entre as 11:00 e as 13:00 horas.

A piscina da Marisma abría as súas portas o luns e malia estaren preparados para afrontar unha caída dos abonos e socios atopáronse cunha sorpresa agradable: os usuarios regresaron dispostos a retomar os seus hábitos deportivos. “Incluso nos atopamos con veciños que decidiron darse de alta, consciente de que este será un verán atípico e un bo momento para retomar a actividade física” explica o director da piscina de Redondela, Xosé Fernández.
Uns usuarios que se atoparon cunha batería de medidas encamiñadas a respectar o establecido polas autoridades sanitarias e, sobre todo, a garantir que se atopan nun espazo seguro: un circuíto para que a xente se cruce o menos posible, hidroxel e postos de desinfección, servizo de limpeza permanente, restrición do 75% do aforo, ampliación das instalacións do ximnasio para garantir a separacións das máquinas, franxas horarias para maiores que terán preferencia no acceso a piscina entre as 11:00 e as 13:00 horas ou incluso a instalación dunha cámara térmica na entrada do edificio que alerta no caso de que alguén supere os 37,2 graos.
O uso da máscara tamén é obrigado para acceder á instalación e para moverse por zonas comúns, pero non así para facer deporte.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *