Hoxe é Venres 27 de Novembro de 2020

A Confraría de Arcade pide a suspensión da actividade e axudas para os traballadores do mar

RR_Noticias

Os socios da Confraría de Pescadores de Arcade están a vivir unha situación “de angustiosa incerteza” por mor da crise sanitaria do coronavirus e as súas consecuencias na economía. Denuncian que se atopan “sen información, ou case nula”, tanto por parte do goberno central como da Xunta de Galicia. Demandan “a suspensión provisional da actividade e axudas para que os traballadores do mar poidan afrontar esta situación”.

Desde o pósito de Arcade explican que teñen a moitos dos socios que se dedican ao marisqueo “na casa sen poder ir traballar”. Parte deles fano porque non hai compradores, e outros para cumprir coas recomendacións de loita contra o COVID-19, ou por atoparse entre os grupos de poboación de risco. Sinalan que esta situación por mor do Estado de Alarma “non é só unha traba para traballadores e traballadoras do marisqueo”, xa que tamén afecta aos naseiros da anguía. Ao non ter compradores para este produto “están a acumulalo nas piscinas, onde acabará perdendo peso e morrendo”. Por outra banda, os trasmalleiros venden o choco a un prezo moi baixo, “logo de ir a faenar co risco que supón e volvendo ás súas casas cunha renta indigna”. No pósito son conscientes “da problemática e excepcional situación que se está a vivir en todo o país”, pero advirten que o que está a suceder no sector da pesca artesanal “é unha cuestión que precisa que se tomen medidas man xa”.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *