Hoxe é Domingo 29 de Novembro de 2020

O Concello de Redondela atrasa o cobro do Imposto de Vehículos de Tracción Mecánica

RR_Noticias

O pago debería comezar o vindeiro 6 de abril e queda prororgado ata novo aviso. O goberno local anunciou tamén a posta en marcha doutras exencións e redución de taxas, como as que afectan aos postos dos mercados ou aos feirantes, así como a ampliación de prazos para pagamento de notificacións pendentes.

O Concello anunciou hoxe a posta en marcha de modificacións no pago de diferentes impostos ou tributos locais co fin de dar facilidades á cidadanía. Entre as medidas adoptadas está atrasar o cobro do imposto de vehículos de tracción mecánica, período de pagamento que tería que comezar o vindeiro 6 de abril e que queda prorrogado ata próximo aviso. Este adiamento faise extensible a outros de carácter individual como a taxa municipal da Escola de Música de Redondela, que non se pasará ao cobro ata que se restablezan as clases de forma habitual.
Outra das taxas que serán recalculadas, e cuxa modificación será realizada “de oficio” pola Administración local sen necesidade de solicitude previa por parte dos interesados, é a taxa por ocupación de vía pública dos postos da feira, afectados pola cancelación desta actividade tanto en Redondela coma en Chapela.
Doutra banda, os postos dos mercados de  abastos  municipais, obrigados  a  permanecer pechados debido a declaración do estado de alarma, quedarán exentos do pago da taxa correspondente aos períodos nos que efectivamente permanezan pechados.
Dende o servizo de Recadación do Concello de Redondela queren recordar que os procedementos para a cidadanía fixan o prazo do 30 de abril de 2020 tanto para o pagamento caso de recibir unha notificación no domicilio; caso de recibir un requirimento para contestar nun prazo determinado; e para dar resposta se se lle notificou un prazo de audiencia.
No suposto de querer presentar un recurso de reposición deberase facelo a partir do 1 de maio de 2020. Por último, se ten concedido un fraccionamento de pagamento ou aprazamento, o Concello de Redondela non cargará nada na conta bancaria ate o 30 de abril de 2020.
A alcaldesa Digna Rivas, cualificou estas medidas como “de xustiza” xa que en casos “excepcionais” como é esta crise do Covid-19 “o Concello, como administración máis próxima a cidadanía, ten a obriga de actuar con rapidez na adopción de medidas que contribúan a axudar a veciños e veciñas a pasar esta crise”.
Nese sentido, o adiamento de taxas e ampliación de prazos contribúe “a que a veciñanza poida cumprir coas recomendacións de quedarse nas súas casas como medida de prevención contra o avance do coronavirus”. A estas medidas “iranse engadindo outras encamiñadas tanto a velar polo benestar e a saúde da veciñanza, como para facerlles máis doado este tempo de pechamento nas súas vivendas”.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *