Hoxe é Xoves 22 de Abril de 2021

O Choco frea en Bergantiños

RR_Noticias

Os anfitrións impuxéronse nun partido moi disputado (2-1) no que se anulou un gol a Yeriai por un dubidoso fóra de xogo. No lado positivo vitoria do Atl. Vilar, Chapela e Nespereira. No fútbol sala  omarcal gañaron o Pazos e o Arealonga e empatou o Redondela. No balonmán triunfos para Rodosa Chapela e SAR Plastic Omnium.
 

Terceira División

Bergantiños 2-1 Choco
Chegaba o CD Choco a Bergantiños coa ilusión de poñer o broche de ouro a unha moi boa primeira volta con 3 puntos. Pero o bo xogo dos de “Gonza” non foi suficiente, faltoulles efectividade para meter as ocasións creadas. O plantel redondelán dominou o xogo, tivo a posesión do balón e imprimiu o ritmo do partido, pero non foi quen de materializar as chegadas á portería de Christopher. E o Bergantiños púxose por diante grazas a un remate de cabeza de Agulló no minuto 4. A partir de aí o conxunto anfitrión replegou liñas e anulou o xogo do Choco que, tras o descanso, acentuou o seu dominio. No minuto 63, coa entrada de Davicín, o Choco tivo máis profundidade, pero o Bergantiños defendeu preto da súa área. E cando máis apretaba o Choco, chegaría o segundo tanto dos locais, nunha contra logo dun tiro de Félix que se vai alto. Rivera sería o autor do tanto, subindo o 2-0 ao marcador. Con todo, o Choco non cedeu na presión, e a catro minutos para o final, atopou o gol que mantivo a tensión ao choque. Sergio Santos disparou desde dentro da área, o balón tocou nun defensa, deu no traveseiro e nas costas de Christopher antes de aloxarse na portaría. E xa sobre o tempo regulamentario Yerai marcaría o segundo, anulado ao interpretar o colexiado que o xogador estaba en fóra de xogo. Xogada dubidosa que propiciou as queixas da bancada da afición de Redondela. Remata o Choco a primeira volta no 6º posto da táboa, empatado a puntos co 5º, o Fabril, quen será precisamente o seu rival esta próxima xornada. O Choco comeza a segunda volta como visitante no campo do filial do Depor.
Primeira Galega

Umia 4-0 Arcade
O líder foi moi superior ao conxuto de Soutomaior, que baixa ao 10º posto. Na próxima xornada reciben ao Tyde, que é 6º, pero a só 1 punto de distancia.
Segunda Galega

Cesantes 1-3 Domaio
Os do Morrazo levaron os 3 puntos de redondela e seguen na parte da táboa, mentres o Cesantes se afunde no 16º posto da clasificación. Poderán mellorar a súa situación o domingo, cando visitan o campo do pechacancelas, o At. Faxilde.
Louro 1-4 Atl Vilar
O equipo de Vilar impúxose con claridade no campo do pechacancelas do seu grupo, o Louro. Agora os de Jorge Iglesias son 14º e confían en mellorar posicións nesta segunda volta para acadar o obxectivo da permanencia. O domingo teñen un duro rival en San Martiño, reciben ao Ribeira, 4º clasificado.
Terceira Galicia

Chapela 1-0 Moledo
O Chapela impúxose pola mínima ao Moledo e mantense na 4ª praza. Na próxima xornada visita o campo do Sampaio, 7º do grupo, pero a tan só 1 punto de distancia.
Nespereira 2-1 San Roque Casa Branca
A gran sorpresa da xornada foi o triunfo do pechacancelas ante un dos equipos que pelexa por disputar o play off de ascenso, nun choque no que, ademais, o Nespereira fixo un gran traballo. Adiantouse no primeiro minuto, marcou en propia meta do gol do empate e quedou finalmente cos tres puntos cun tanto de Francisco Iglesias a vinte minutos do final. Na próxima xornada visitan o campo do Peñasco.
Fútbol Sala

Terceira División

Unión GRB 2-8 Pazos de Borbén F.S
Importante vitoria dos de Pazos, que se afastan dos postos complicados da táboa grazas á goleada protagoniada por Luis(4), Diego(1), Sandro (1), Aarón (1), e Pablo(1). Na próxima xornada reciben en Pazos ao Outeiro de Rei, co rival situado no pozo da clasificación. Será o sábado ás 19.00 horas.
Preferente Sur

As Neves 3-3 Redondela Maramar
Regresaron á competición cun empate, despois dun longo parón de liga, e conseguiron un empate que vale ouro no pavillón das Neves, o líder do grupo. O Redondela Maramar segue 2º, en postos de ascenso directo, a 3 puntos do liderado e empatado co EDO Sala Ourense, que gañou en Chapela. Na próxima xornada visitan a pista do Coperfi Cereixa Gondomar, 5º clasificado a 5 puntos de distancia. O domingo ás 17.00 horas.
Campito 4-6 EDO Sala Ourense
Derrota en Chapela nun partido moi disputado que deixa ao Campito no 8º posto. O domingo repiten como locais e reciben ao Abetos Gondomar, 6º do grupo, con 3 puntos máis.
Primeira Galicia

Vigo FS “B” 0-11 Arealonga Const.Castro
Os de Chapela seguen como líderes indiscutibles do grupo logo dunha abafante goleada ante o Vigo FS “B”. Na próxima xornada teñen descanso, regresarán á competición o 25 de xaneiro. Será no pavillón do Baiña “B”.
Balonmán División de Honra Prata Feminina

Zonzamas 36-33 SAR Rodavigo
Gran partido da SAR en Lanzarote, pero sen recompensa. O encontro púxose complicado desde o comezo para as de “Chini”, que aos poucos foron recortando distancias ata poñerse a un gol (21-20). A partir do 26-25 o Zonzamás logrou un parcial de 3-0, que xa foi definitivo. Na próxima xornada reciben ao Porriño, coas rivais no ecuador da táboa.
Primeira Nacional

Lavadores 24-37 Rodosa Chapela
O Rodosa Chapela segue imparable, e xa está a 1 punto do líder logo dunha abafante vitoria sobre o Lavadores, pechacancelas do grupo. Os vigueses só aguantaron o ritmo os primeiros dez minutos, a partir de aí o Chapela foi abrindo distancias no marcador. Chegou o descanso con 13-17 e seguiu ampliando a fenda ata os 13 goles ao remate do encontro. No 3º posto, a 1 punto de Lalinense e Lanzarote, que comparten liderato, a próxima fin de semana volven xogar fóra. Comezan a segunda volta no pavillón do Carnes do Ribeiro, situado na metade baixa da táboa.
Primeira Autonómica

Galipizza Viveiro 22-29 SAR Plastic Omnium
O conxunto redondelán mantén o liderado do grupo logo dun partido en Viveiro no que foi moi superior aos anfitrións. Esta fin de semana remata a primeira volta na pista do Pavillón Ourense, 10º clasificado.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *