Hoxe é Mércores 28 de Outubro de 2020

En galego máis aló da morte

RR_Noticias

Medio cento de persoas súmanse ao acto do Servizo de Normalización Lingüística celebrado este domingo no camposanto de Reboreda. Unha actividade enmarcada na campaña “En galego, agora e sempre” que busca promover o uso do galego en necrolóxicas, lápidas e actos fúnebres. O vindeiro domingo día 16 o acto repetirase na parroquia de Ventosela.

As persoas asistentes asinaron a declaración de vontade individual, pola cal escollen o galego como o idioma no cal queren ser lembrados (necrolóxicas, lápidas, actos fúnebres…) e descubriuse unha placa na entrada do camposanto de Reboreda para honrar a quen nos legou a cultura de Galicia.
Unha iniciativa do Servizo de Normalización Lingüística que quere así concienciar sobre o uso do galego nos actos fúnebres. Segundo explica Xurxo Martínez, técnico deste departamento municipal “é unha anomalía que persoas que falaron galego toda a súa vida, sexan lembradas con esquelas e lápidas só en castelán”. De feito, só o 1% das lápidas de Galicia están en galego “cando un 80% dos enterrados falaron só galego en vida”.
A campaña promove que os veciños asinen unha declaración pola cal se reivindican seren lembrados en galego ademais de colocarse placas nas entradas dos camposantos de “homenaxe e recordo para honrar aquelas persoas que mantiveron viva a nosa cultura e lingua”. Por outra banda o SNL ten distribuído en negocios relacionados co sector funerario (floristerías, marmolarías…) un tríptico informativo da campaña. O SNL dispón de modelos de documentación administrativa para seguros de vida ou modelos de esquelas en lingua galega.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *