Hoxe é Luns 26 de Outubro de 2020

O BNG acusa a Bas de “manipular á comunidade educativa coa cuberta do Colexio Santa Mariña”

RR_Noticias

O Concelleiro do BNG, Xoán Carlos González lembra que malia ser a construción do patio cuberto deste centro educativo unha das promesas electorais de Javier Bas cando se presentou á alcaldía por primeira vez, “recoñecían no pasado pleno de xaneiro que non van afrontar esta obra por tratarse dunha actuación que corresponde á Xunta”. Para o BNG este feito amosa o engano do Partido Popular á comunidade educativa, “porque nunca tiveron vontade para facelo”.

A demanda da construción da cuberta para o patio co fin de que os máis de catrocentos alumnos e alumnas puideran gozar dun espazo de xogo, nos días de choiva, contou cun importante apoio social.  Dende acordos asemblearios, recollida de ata 3.000 sinaturas, mobilizacións ante a Xunta, tanto en Vigo como en Compostela, acordos plenarios. Daquela, o candidato Javier Bas recollera esta demanda como promesa electoral. “Unha vez que chegou a alcaldía todo foron escusas, mesmo ameazas por considerar que a ANPA estaba politizada”, asegura o edil nacionalista.
Segundo Xoán Carlos González “manipulouse e enganouse á comunidade educativa co único fin de apañar votos, para máis tarde desentenderse dos seus compromisos”. Considera que se está a castigar ás familias e alumnado por seren tan reivindicativos nunha proposta lóxica. “Agora recoñecen que nunca foi competencia do Concello, nin nunca tiveron vontade para construír o patio cuberto”.
Xoán Carlos González empraza a Javier Bas a presionar ante a Xunta de Galiza, para que o patio cuberto do CEP Santa Mariña sexa unha realidade.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *