Hoxe é Mércores 25 de Novembro de 2020

SAR Rodavigo, o mellor equipo galego da liga

RR_Noticias

O equipo redondelán, na cuarta praza de Honra Prata feminina, consolídase como o mellor galego da categoría, moi por riba de Carballal, que é noveno, Chapela, no décimo posto, e Seis do Nadal, que pecha a táboa. O domingo visitan a cancha da Cistérniga e aspiran a pelexar polas prazas de ascenso que están a catro puntos.

Falar de balonmán feminino en Galicia é falar do sur da provincia de Pontevedra. De feito, a SAR é o terceiro mellor conxunto desta disciplina na comunidade, só por detrás de Guardés e Porriño, que militan na División de Honra. Na prata acompañan á SAR outro equipo do municipio, o Chapela, e dous vigueses, Carballal e Seis do Nadal. Unha posición que deixa ás de Elisardo Covelo “Chini” en posición de dar a batalla polo ascenso. O técnico amósase moi satisfeito co xogo do equipo que está a ser “mesmo mellor que o ano pasado”. Están a un punto do Oviedo, que ocupa a terceira praza, a catro do Cleba León, que é o segundo, co Puerto del Carmen como sólido líder a sete puntos. Na pelexa están tres equipos, descartado xa o liderado das de Lanzarote, a un gran nivel. Entre Cleba, Oviedo e SAR estará a segunda praza, e “Chini” advirte que os enfrontamentos directos serán “decisivos” nas once xornadas que quedan por diante. Neste tramo de competición agarda recuperar algunhas xogadoras lesionadas, xa que malia comenzar a temporada con 15 fichas, as baixas deixaron mermado ao equipo. As xogadoras da categoría autonómica están a axudar ao equipo, e mesmo algunhas xuvenís están a adestrar co conxunto de máxima categoría. O adestrador valora moito o compromiso de todas e a súa colaboración, e agarda poder “darlles minutos na competición”, xa que sería un premio “moi merecido”. O certo é que a canteira feminina do balonmán SAR non deixa de medrar, e está a colleitar moi bos resultados. O feito de que o primeiro equipo milite na liga Prata e con excelentes resultados tamén anima ás máis pequenas a practicar este deporte. O club conta agora con dous equipos femininos nas categorías alevín, infantil e cadete. Cistérniga-SAR Logo da vitoria ante o Carballal a pasada xornada, o próximo domingo visitan o pavillón da Cistérniga, en Valladolid. Unha cancha “complicada”, segundo o técnico na que acusarán ademais o longo desprazamento en autobús, malia que confía nun resultado positivo. Será o domingo ás 12.30 horas. Xixón-Chapela O Cíes Chapela, que ocupa a décima praza do grupo, xogará o sábado ás 17.00 en Xixón, rival difícil, quinto clasificado do grupo.

Elisardo Covelo "Chini" adestrador da SAR
O técnico salienta a boa campaña que está a realizar o equipo.
Pelexa polo ascenso
Están a catro puntos dos postos que marcan o ascenso e pendentes dos enfrontamentos directos.
Excelente canteira
A canteira feminina no balonmán SAR medra cada ano.
Hand Vall La Cistérniga-SAR Rodavigo
Viaxan a Valladolid o domingo para un enfrontamento que se prevé complicado.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *