Hoxe é Luns 26 de Outubro de 2020

Chapela, a parroquia abandonada

RR_Noticias

Abandonados por parte do Concello, así é como se senten moitos veciños de Chapela. Beirarrúas rotas, falta de limpeza, camiños intransitables e falta de servizos públicos son algunhas das súas denuncias. Critican que mentres Redondela goza de rúas limpas, amplas beirarrúas e fermosos parques, a súa parroquia presenta un estado “lamentable”.

Este “agravio comparativo” coa vila de Redondela é o que máis molesta a Marta, que lembra que tamén en Chapela pagan impostos, mentres a parroquia presenta “moitas deficiencias”. Falta de limpeza nas rúas, unha gardería pública ou espazos de lecer son algunhas das súas demandas. Unha opinión que comparte Fernando, que denuncia o estado de “abandono” da parroquia por parte do goberno local. Nalgunhas zonas, como o camiño Real, as deficiencias son un verdadeiro “perigo” para peóns, como denuncia Carlos. Sinala que esta baixada “nunca se arranxou”, e que son moitos os veciños que teñen que empregala a diario, malia o seu estado “desastroso”. O camiño da Grila tamén presenta “un problema de seguridade”, segundo explica Jesús, que só se resolvería coa construción dun muro de contención que evite as fendas na beirarrúa. No barrio do Cubillón existe tamén un grave problema desde que se pechou a vía do tren. Os veciños, para desprazarse a pé, deben facelo por unha estrada estreita, sen beirarrúas e con moito tráfico pesado, o que supón un “serio perigo”. Outra alternativa é utilizar unha ponte sobre a vía en moi mal estado de conservación, “con pasos rotos e que tremen”. Begoña, que reside na zona, a solución sería “un paso soterrado”, xa que os veciños de máis idade ou os que deben levar carros de nenos, non poden utilizar ese acceso. Son moitas as zonas de Chapela que presentan deficiencias e que supoñen supoñen un perigo. O camiño do Castañal, cheo de buracos, o camiño dos Balandros, o dos Olmos, o dos Salgueiros, ou o camiño da Correola son algúns dos moitos que presentan deficiencias. Desde a Asociación de Veciños da parroquia asegura que todos estes problemas xa foron postos en coñecemento do goberno local por rexistro, sen que polo de agora se resolveran. A presidenta, Ánxeles Méndez, sinala que o seguinte será instalar unha pancarta en cada un dos puntos denunciados.  

O camiño Real
Carlos explica que o estado do camiño é desastroso.
Falta de servizos
Marta fala das numerosas deficiencias que existen na parroquia.
Camiño da Grila
Jesús explica que a única solución sería facer un muro de contención.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *