A III Semana Grande de Soutomaior continúa este mércores coa súa programación festiva cunha nova verbena que terá como protagonista á orquestra Kubo. A actuación celebrarase no torreiro da Feira da Devesa, en Candán, xunto ao campo de fútbol, e contará tamén coa participación da disco móbil Dolce Vita.
As festas chegarán ao seu remate o venres, 7 de agosto, cunha das citas máis agardadas do programa, protagonizada pola Orquestra París de Noia e Eme Music. Entre os días 5 e 7 de agosto desenvolveranse tamén os actos relixiosos en honra da Virxe da Peneda, San Salvador e San Caetano.
Co fin de facilitar os desprazamentos durante as xornadas de maior asistencia, o Concello manterá un servizo gratuíto de autobús lanzadeira os días 5 e 7 de agosto entre o Pavillón da Montesiña “Alfonso Pazos” e o Torreiro da Feira da Devesa, en Candán.
Ademais, volverá poñerse en marcha o programa Soutomaior Inclusivo, que ofrecerá cascos antirruído para persoas con hipersensibilidade auditiva, unha iniciativa coa que o Concello busca favorecer a participación de toda a veciñanza e avanzar cara a unhas festas máis accesibles e inclusivas.
