Os documentos foron doados por un veciño de Vigo con antepasados na parroquia do Viso quen localizou os textos entre a documentación legada polos seus antepasados. A escritura recolle un acordo entre o Conde de San Román e o presbítero Dionisio de Amoedo polo alugueiro de terras. Os textos foron dixitalizados e transcritos polo persoal do Arquivo Municipal para a súa consulta pública e convértense no orixinal máis antigo dos seus fondos.
Foi o propio veciño –que desexa permanecer no anonimato- quen se puxo en contacto coa Concellería de Cultura logo de comprobar que os manuscritos facían referencia expresa á parroquia do Viso. Tras avaliar o extraordinario interese dos textos para a conservación e difusión do patrimonio local, o Concello e o doador formalizaron o acordo de cesión para que sexa custodiado correctamente.
O texto principal é un contrato foral manuscrito asinado por D. Pedro Miranda Omaña e Osorio, Conde de San Román de Soutoxuste (O Viso), e o presbítero Dionisio de Amoedo, cura da feligresía de Santiago de Arcade. A través deste documento, o conde acordaba co párroco e cos seus futuros descendentes o aluguer dunha serie de propiedades a cambio do pago anual de corenta ducados de moeda de vellón e a entrega dun carro de leña semanal. O texto detalla minuciosamente todas as casuísticas do contrato, estipulando por exemplo que a data de pago anual debía ser o día de San Martiño.
Dixitalizado e transcrito
Grazas a que o Arquivo conta co apoio de Almudena Bouzón, bolseira especialista en Historia Medieval, procedeuse á transcrición dos textos. Deste xeito a cidadanía e os investigadores teñen xa á súa disposición tanto a copia dixital das escrituras orixinais como a súa correspondente transcrición en texto moderno.
A alcaldesa de Redondela, Digna Rivas, amosou o seu profundo agradecemento por este xesto cidadán e sinalou que “recibir un documento de tanta relevancia é unha honra e unha enorme responsabilidade histórica para o noso Concello. Estes textos son a proba das nosas raíces e da nosa identidade como pobo. Grazas a esta doazón, un patrimonio que estaba gardado nun ámbito privado pasa a ser públicos e de todos os redondeláns e redondelás”.
O Ministerio de Cultura elixe a Redondela para a Comisión Técnica de Arquivos.
Esta histórica incorporación ao arquivo coincide cun momento de gran recoñecemento institucional para o departamento. O Ministerio de Cultura elixiu a responsable do Arquivo de Redondela, Ana Gesteira Ponce, para representar aos arquivos municipais na nova Comisión Técnica de Arquivos de Administración Local (CTAAL). Xunto co arquivo de Lugo é o único representante de Galicia neste órgano, creado para valorar e mellorar a situación dos arquivos de municipios e deputacións. Para o Concello de Redondela é unha honra que o seu Arquivo fose elixido de entre moitos, “o que demostra que o traballo realizado neste departamento municipal serve de referente máis alá das fronteiras da vila”.
