Foto de David Regades e Digna Rivas.
As obras de rehabilitación do edificio histórico da Subida á Estación, que acollerá o futuro Viveiro e Centro de Negocios da Zona Franca de Vigo, sairán a licitación nos próximos días. O anuncio supón un paso decisivo para un proxecto que levaba meses á espera da autorización da Dirección Xeral de Patrimonio, un trámite imprescindible por tratarse dun inmoble catalogado. Co visto e prace xa concedido, a previsión é que os traballos poidan comezar a finais deste ano, no mes de decembro, ou durante o primeiro trimestre de 2027.
Así o avanzaron este martes o delegado do Estado na Zona Franca de Vigo, David Regades, e a alcaldesa de Redondela, Digna Rivas, durante unha visita ao edificio e á súa contorna, onde tamén presentaron os detalles do proxecto.
Regades destacou que “daremos un paso definitivo coa saída a licitación das obras. Se todo vai segundo o previsto, poderemos iniciar os traballos a finais deste ano ou a principios de 2027”. O delegado subliñou que a recuperación do inmoble permitirá “preservar patrimonio histórico e, ao mesmo tempo, crear un espazo pensado para favorecer o emprendemento, atraer talento e xerar emprego cualificado en Redondela”.
O responsable da Zona Franca lembrou ademais que este centro completarase coa rede de viveiros empresariais que a entidade xa ten en funcionamento en Vigo, Baiona, Nigrán e O Porriño. “Queremos apoiar a economía local e facilitar que nazan novas empresas nun municipio tan importante como Redondela”, afirmou.
Un edificio histórico convertido nun moderno espazo para emprender
O proxecto conta cun investimento de case 1,7 millóns de euros e permitirá recuperar un edificio que actualmente se atopa en estado de ruína para transformalo nun moderno centro de negocios.
A actuación respectará os elementos máis característicos do inmoble, como os muros exteriores de granito de 50 centímetros de espesor e as galerías tradicionais de madeira, que serán restauradas. Ao mesmo tempo incorporarase tecnoloxía actual, con sistemas de climatización eficientes, iluminación LED, conexións de alta velocidade e unha infraestrutura de telecomunicacións preparada para dar servizo ás empresas.
Unha das intervencións máis destacadas será a recuperación do patio interior, convertido nun xardín de 60 metros cadrados que servirá como espazo de encontro e mellorará a conexión do edificio coa contorna.
O edificio contará cunha superficie construída de máis de 612 metros cadrados, distribuídos en planta baixa e dúas plantas.
Na planta baixa situaranse os servizos comúns, aseos, instalacións e unha sala polivalente duns 100 metros cadrados. A primeira planta albergará dous espazos destinados a emprendedores, ademais do xardín interior. Na segunda instalarase unha galería expositiva e unha ampla sala diáfana destinada a actividades empresariais, formativas e de innovación.
O obxectivo é ofrecer espazos flexibles para persoas autónomas, emprendedores e pequenas empresas que precisen oficinas modernas e ben comunicadas.
A contorna tamén cambiará por completo
A posta en marcha do Centro de Negocios irá acompañada da transformación da praza da Ponte de Lima, onde o Concello de Redondela está executando unha reforma integral a través dunha subvención da Deputación de Pontevedra.
A actuación creará un novo espazo público de 2.300 metros cadrados, máis accesible e pensado para o uso da cidadanía. Entre as novidades destaca a instalación dun ascensor urbano que eliminará o importante desnivel coa Subida á Estación e facilitará o acceso ao futuro viveiro de empresas. Ademais, habilitarase un auditorio ao aire libre e novas zonas verdes.
A alcaldesa, Digna Rivas, cualificou a xornada de “histórica” para o municipio e agradeceu o compromiso da Zona Franca. “Este proxecto responde a unha demanda histórica do tecido empresarial de Redondela e, ao mesmo tempo, permite recuperar un edificio emblemático para convertelo nun motor de futuro”, sinalou.
Rivas destacou tamén que a renovación da praza resolverá un problema histórico de accesibilidade e converterá unha zona de paso nun novo espazo público para actividades culturais, sociais e empresariais.
Segundo as previsións municipais, as obras da praza estarán rematadas antes de que finalice este ano, polo que a contorna estará preparada cando arranque a rehabilitación do edificio da Zona Franca.
Co inicio da licitación, o proxecto entra agora na súa fase definitiva despois de varios meses de espera polos permisos administrativos de Patrimonio. Se non xorden imprevistos durante a adxudicación, Redondela poderá ver comezar as obras entre finais de 2026 e os primeiros meses de 2027.
