O Pazos de Borbén FS conseguiu o obxectivo da permanencia en Terceira División Nacional. No último partido da liga conseguiron unha sólida vitoria contra o Friol FS por 7-3. O equipo, xa consolidado na categoría, pecha a tempada no oitavo posto. Este curso estivo marcado pola irregularidade nos resultados, aínda que finalmente conseguiron rematar nunha posición cómoda na clasificación.
O encontro non comezou doado para os locais. Sabedores da importancia de sumar os tres puntos, os vermellos saíron decididos desde o inicio, aínda que se atoparon cun conxunto lucense serio e ben organizado. O Friol adiantouse no marcador e mantívose con opcións ata ben entrada a segunda metade, complicando o partido máis do previsto.
Co paso dos minutos, o Pazos de Borbén foi impoñendo o seu ritmo e eficacia ofensiva. Os goles de Costas (2), Jacobo (2), Diego, Luis e Martín acabaron por decantar o marcador e certificar unha vitoria clave para selar a permanencia.
Máis aló do resultado, a xornada quedará para o recordo polo espectacular ambiente vivido. A afección respondeu unha vez máis, enchendo a bancada de vermello desde primeiras horas do día. O apoio constante empurrou ao equipo nun partido decisivo e contribuíu á celebración.
Categoría Preferente
CAMPITO CHAPELA F.S. – BAÍÑA F.S. (6-2)
O Campito FS tamén rematou a tempada con vitoria na Preferente. Graias ao 6-2 contra o Baíña na casa conseguiron situarse no posto 11 da clasificación con 35 puntos.
C.D. BEADE – S.D. PAZOS DE BORBEN FS “B” (1-1)
Tras este empate como visitantes o filial do Pazos de Borbén remata a liga no posto 12 da clasificación con 30 puntos.
A pesar de manterse fóra dos postos de descenso directo, ambos conxuntos atópanse nunha situación delicada. A día de hoxe, poderían verse afectados polos posibles descensos en cadea procedentes de categorías superiores. A súa permanencia dependerá, en boa medida, do que aconteza nos play-offs de Terceira División: un ascenso galego na eliminatoria contra Cantabria permitiríalles asegurar a continuidade na categoría. Polo tanto, haberá que agardar para coñecer o desenlace definitivo.
Primeira Futgal FS
O AREALONGA FS descansou e prepárase para os dous últimos partidos que quedan de tempada en Primeira. O seguinte será contra o Crecentes FS, segundo clasificado. Nestes momentos os de Chapela están no posto 10 da táboa e precisan sumar.
