O Club de Xadrez de Chapela, en colaboración co Concello de Redondela, organiza o I Torneo de Xadrez de Nadal, que se celebrará o próximo sábado 21 de decembro no Multiusos de Chapela (Piñeiral do Crego, nº22). Este evento, dirixido a todos os afeccionados ao xadrez, terá lugar entre as 16:00 e as 20:00 horas e contará cun formato rápido de xogos.
O torneo está aberto á participación de xogadores de todas as idades e niveis, pero establece un límite de 60 participantes. A competición desenvolverase en seis roldas rápidas, con tempos de 10 minutos por partida máis incremento de cinco segundos por xogada.
A cota de inscrición para o evento é de 5 euros, agás para os socios do Club de Xadrez de Chapela, que poderán participar de forma gratuíta. Este torneo busca fomentar a práctica e o coñecemento do xadrez na contorna local, así como ofrecer unha actividade lúdica para todos aqueles que desexen despedir o ano de maneira diferente e competitiva.
As persoas interesadas en participar no I Torneo de Xadrez de Nadal poden inscribirse a través do código QR do cartel e para máis información pódese contactar co Club de Xadrez de Chapela a través do número de teléfono 696 17 22 18 ou enviando un correo electrónico a xadrezchapela@gmail.com.
