Foto da presentación do libro.
‘As múltiples cores da vida’ é o segundo libro da colección Feminismos da editorial Galaxia editado en colaboración coa Universidade de Vigo. Trátase, nesta ocasión, dunha obra na que se amosa a dura realidade que ten que enfrontar o colectivo LGBTIQ á vez que se fan propostas de estratexias para promover unha sociedade máis xusta e libre de discriminacións e violencia.
A obra organízase en seis capítulos. Os dous primeiros presentan experiencias de discriminación e violencia nos diferentes ámbitos vitais relatadas en primeira persoa, mentres que nos dous seguintes abórdanse realidades máis específicas, entre elas, un estudo da situación destas persoas ao chegar á vellez, concretamente en centros destinados para esta etapa da vida. Os dous últimos capítulos céntranse en propor estratexias complementarias para avanzar cara sociedades máis xustas e inclusivas.
Un dos capítulos, titulado ‘A linguaxe non binaria en galego. Reflexións sobre o uso e proposta gramatical ‘, está escrito por Carla Bóveda (Redondela) e Ártemis López (Vigo). Nel falan dos cambios actuais no ámbito lingüístico na lingua galega cara a linguaxe inclusiva. Investigando a gramática para deixar unha guía que permita utilizar a linguaxe non binaria e distinguila das formas inclusivas menos formais. Para Carla “trátase de que todes podamos empregar a nosa voz”.
O seu é o único capítulo que fala de lingua. Os demais tratan distintos temas sobre como crear outras pedagoxías e axentes sociais cara o cambio. Desbotan na súa proposta o uso do X e dos asteriscos ou o @ “pola subxectividade que xeran”.
Ademais da publicación desta obra. Carla bóveda forma parte da Rede Galega de Estudos Queer ( @rgequeer) onde traballan a través de congresos e diferentes eventos “para inspirar a xente e falar de temas que están nas marxes e tecer redes de apoio dentro do académico”.
A intención, conta a autora, é que se entenda a mensaxe porque “non se trata de adoutrinamento, senón de mostrar unha realidade”. No libro mostran como “o colectivo LGBTIQ continúa sufrindo discriminación, violencia ou dificultades de integración”.
`As múltiples cores da vida. Corpos, identidades e orientacións sexuais‘ escrito por Carla Bóveda, Rebeca Jorge Rodríguez, Ártemis López, Alejandro Raposo González, María Victoria Carrera, Nazaret Blanco Pardo, Estrela Rivas López e editado por María Victoria Carrera Fernández e Nazaret Blanco Pardo con Editorial Galaxia está dispoñible en múltiples librarías e na páxina web de Galaxia.
Ligazón do libro na páxina de Editorial Galaxia: `As múltiples cores da vida. Corpos, identidades e orientacións sexuais‘
