Chus Guedella no local Coworking onde amosou a súa obra
A inauguración terá lugar este xoves 22 de febreiro ás 20:30 horas e será unha oportunidade de achegarse aos retratos hiperrealistas realizados por Guedella e doados á asociación Apamp (Asociación de familias e persoas con parálise cerebral).
Arte e gastronomía vegana concílianse no local de Espaço Vivo no Camiño do Fixón 64, na parroquia de Negros. Nesta ocasión a proposta artística corre a cargo do redondelán Chus Guedella quen presenta este xoves ás 20:30 horas unha exposición de retratos elaborados con boli Bic.
Con formación como deseñador, no inicio o seu estilo era máis caricaturista evolucionando cara o hiperrelismo, estilo no que se enmarcan os retratos, principalmente de actrices e actores galegos, que poderemos ver nesta mostra.
De feito, Chus Guedella concilia o seu traballo en produción audiovisuais con este hobby: debuxar con boli Bic.
Toda a colección de retratos que podemos ver no Espaço Vivo foi doada a asociación APAMP, centrada en contribuír ao desenvolvemento da vida das persoas con parálise cerebral prestando os apoios necesarios tanto aos afectados como as súas familias.