A Alameda Rosalía de Castro de Chapela acolleu na tarde de onte a presentación dos actos vencellados á celebración do Día de Rosalía. O goberno local decidiu arroupar unha iniciativa lanzada dende os institutos titulada “Unha semaniña enteira” falando galego. Un reto ao que se suman os funcionarios do Concello e que inclúe iniciativas, do 26 de febreiro ao 3 de marzo, nas Prazas de Abastos e nos clubs deportivos.
O Concello de Redondela ten a intención de “amosar o seu compromiso con esta muller universal” de forma transversal implicando distintas institucións e sectores do municipio. O técnico do Servizo de Normalización Lingüística, Xurxo Martínez, explicou que para todo isto “elaboráronse unhas chapas co rostro de Rosalía entre os participantes do reto co lema da campaña”.
O responsable de Dinamización Lingüística do IES Chapela, Aldán Satamarina, sinala que a idea naceu “da necesidade de fomentar o uso do galego entre os mozos e mozas”, xa que no instituto constatan que uso da lingua do país cada ano é menor”. Por iso considera importante que participen, ademais do sector do ensino, os clubs deportivos, o cadro de persoal municipal, a hostalaría, comercios e as prazas de abastos.
Aldán é consciente de que o “principal premio de falar galego é re-atoparse con si mesmos e coa súa identidade”, pero adiantaba que “o Concello e os institutos organizan un concerto sorpresa para ao alumnado que participe na iniciativa como motivación e aliciente ”.
A iniciativa das Prazas de Abastos, tanto de Chapela como de Redondela, estará en marcha toda esa semana. Consiste nun sorteo dunhas bolsas de tea, cun deseño especial vencellado a Rosalía de Castro, entre aquelas persoas que presenten o día 23 un xustificante de compra destes mercados. O acto de entrega das bolsas (até esgota existencias) farase na Praza de Abastos de Chapela entre as 10 e as 11, e na Praza de Abastos de Redondela, entre as 12 e 13h. Ademais esa xornada do 23, día de Rosalía, o obradoiro de Hostalaría do Concello de Redondela repartirá de balde o chamado Caldo de Gloria. A representante da asociación de empresarios, Xulia Alonso, explicaba a importancia deste caldo feito a partir dunha receita dun poema de Rosalía e que a Fundación Rosalía de Castro leva promovendo dende hai anos.
O presidente da Fundación Rosalía de Castro, Anxo Angueiras, eloxiou a iniciativa que implica “a toda a sociedade, a un pobo enteiro, e que o fai na data de Rosalía, unha figura que nos une e nos representa a todos como galegos”. Lembrou tamén que o Concello de Redondela ten o seu nome escrito “en letras de ouro” na historia da dignificación da lingua galega, e que segue hoxe “nese mesmo camiño”. Con isto referíase ao momento no que Redondela constituíu o Servizo de Normalización Lingüística no ano 1982, un ano antes de que o Parlamento galego aprobase a Lei de normalización. Por este motivo, o municipio situouse como un referente para toda Galicia. A lingua galega converteuse nun motivo de especial orgullo para a cidadanía redondelá.
A alcaldesa Digna Rivas, que pechou o acto, agradeceu a participación de todos os colectivos que se sumaron a este proxecto para promover a lingua e homenaxear a Rosalía de Castro, “unha muller universal e feminista á que teño como referente”. No acto participaron tamén Noemí Moreira, directora do CEIP Alexandre Bóveda, Julia Alonso, como representante da Asociación de Empresarios, Manuel Conde, presidente do club Casa Paco, e Patricia Vilán en representación do cadro de persoal do Concello de Redondela.
Para rematar o acto Rivas e Angueira plantaron na Alameda de Chapela un camelio do xardín da Casa Rosalía cedido pola Fundación. A agrupación Semente Nova foi a encargada de pechalo co himno de Galicia.
