O goberno local ten en marcha unha investigación interna para clarificar os trámites realizados na solicitude dunha subvención ante o Ministerio de Industria, Comercio e Turismo en abril deste ano. A alcaldía decidiu facer pública a existencia desta investigación tras presentar o PP un escrito no que insinúa que existiron irregularidade no proceso.
Explica a alcaldesa Digna Rivas que ante a recepción dunha notificación que denegaba a concesión de dita subvención, o Concello contactou coas persoas involucradas no expediente “para clarificar as causas da non concesión e iniciou unha investigación reservada que actualmente se atopa en curso”. Este expediente de investigación está á espera de contestación de entidades e persoas “que nada teñen que ver nin co grupo de goberno actual nin co persoal do Concello de Redondela”.
Rivas asegura que o goberno local “cumpre escrupulosamente coa normativa legal e non pode tolerar prácticas políticas baseadas en conxecturas propias, e moito menos vai vulnerar o dereito á presunción de inocencia de calquera cidadán sen proba algunha, como pretende o Partido Popular”.
A rexedora advirte que as prácticas políticas que acusan directamente ás persoas “deben ir acompañadas de actos responsables, como a presentación no xulgado destas acusacións, en lugar de insinuacións que en caso de falsidade non carrexen responsabilidade penal ou política algunha”. Desde o Concello explican que para aclarar esta situación está en curso un procedemento administrativo interno “que seguirá a súa tramitación con total respecto á lexislación vixente”.
Unha vez resolta a investigación “o Concello adoptará todas as medidas legais que estean na súa man para depurar responsabilidades no caso de confirmarse que houbo algunha irregularidade ou adulteración nos documentos presentados”.